ԵՐԵՎԱՆ, 14 դեկտեմբերի. /Նովոստի-Արմենիա/. Ինֆորմացիայի ազատության կենտրոնը (ԻԱԿ) նշել է Հայաստանում տեղեկատվության ազատության մասին օրենքի իրագործման հարցում գրանցված դրական տեղաշարժերը՝ ըստ 2011 թ.-ի մոնիտորինգի արդյունքների:
«Հանրապետությունում տեղեկատվության ազատությունը կարգավորող օրենքի գոյության ութ տարիների ընթացքում շատ պետական մարմիններ և պաշտոնյաներ սկսել են ավելի պատասխանատու կերպով վերաբերվել հասարակությանն իրազեկելու խնդրին», - չորեքշաբթի լրագրողներին ասաց ԻԱԿ-ի փորձագետ Լիանա Դոյդոյանը:
Նրա խոսքերով՝ որոշակի վիճակագրություն ներկայացնելու համար «Հայաստանում ինֆորմացիայի ազատությունը» անվանումով մոնիտորինգ է անցկացվել, որը ցույց է տվել, որ չնայած բարեփոխումներին՝ խնդիրը դեռևս հրատապ է:
ԻԱԿ-ի փաստաբան Գևորգ Հայրապետյանն իր հերթին տեղեկացրեց, որ 2011 թ.-ի մայիս-հունիսին անցկացված մոնիտորինգի ընթացքում տեղեկատվություն ունեցող 50 մարմնի 250 հարցում է ուղարկվել տասը մարդկանցից:
«Հարցումներն ուղարկվել են տասը կենտրոնական պետական մարմիններ, տասը մարզային վարչություններ, տասը քաղաքական վարչություններ, տասը գյուղապետարաններ և տասը հասարակական կազմակերպություններ», - ասաց Հայրապետյանը:
Նրա խոսքերով՝ 173 հարցում ուղարկվել է փոստով, 37-ը՝ էլեկտրոնային տարբերակով, իսկ 40-ը ներկայացվել է հեռախոսով բանավոր ձևով:
«Ներկայացված հարցումներից միայն 56 տոկոսին ենք լիարժեք պատասխան ստացել, առանց պատասխան է մնացել հարցումների 30 տոկոսը: Մոնիտորինգը ցույց է տվել, որ առավել պատասխանատու վերաբերմունք է դրսևորել Օշականի գյուղապետարանը, որը պատշաճ ժամկետներում պատասխաններ է ներկայացրել 4 գրավոր և մեկ բանավոր հարցման», - ասաց Հայրապետյանը:
Բոլոր հարցումներն անտեսած մարմինների ցանկում են Այգեձորի գյուղապետարանը, «Կլինիկական հիվանդանոց» ՓԲԸ-ն և «Քեթին Գրուպ» ՍՊԸ-ն:
«Այս գործընթացում արձանագրված երեք հիմնական խախտումները վերաբերում էին հարցումներին պատասխաններ տրամադրելու ժամկետներին (մինչև հինգ օր), ինչպես նաև պատասխանները հաճախ ոչ լիարժեք էին լինում, իսկ պատասխանի տրամադրումը մերժելու դեպքում պատճառներ չէին ներկայացվում, ինչպես նաև լիազորված անձանց հարցումները փոխանցելու խնդիր էր ծագում», - նշել է ԻԱԿ-ի փաստաբանը:
ԵԱՀԿ երևանյան գրասենյակի ժողովրդավարացման բաժնի ղեկավար Օլիվեր Մակկոյն իր կողմից նշեց, որ պաշտոնյաներն, առաջին հերթին, պետք է շահագրգիռ լինեն այս կամ այն պետական մարմնի մասին լիարժեք տեղեկատվություն տրամադրելու հարցում:
«Ես խորհուրդ կտայի բոլոր պաշտոնյաներին իրենց նախընտրական ծրագրերում պատասխանել քաղաքացիներին հուզով բոլոր հարցերին, չէ՞ որ հենց իրազեկվածությունը թույլ կտա նրանց օբյեկտիվ ընտրություն կատարել», - նշեց Մակոյը:
Մոնիտորինգն իրականացրել է Հայաստանի ինֆորմացիայի ազատության կենտրոնը ԵԱՀԿ երևանյանի գրասենյակի և USAID-ի համատեղ ֆինանսավորմամբ:-0-
