Հայաստանը պետք է պետական մակարդակով պայքարի այլ երկրների կողմից հայկական կերակրատեսակների յուրացման դեմ

Հայաստանը պետք է պետական մակարդակով պայքարի այլ երկրների կողմից հայկական ազգային կերակրատեսակների յուրացման դեմ, հայտարարեց «Հայկական խոհարարական ավանդույթների պահպանում ու զարգացում» հասարակական կազմակերպության ղեկավար Սեդրակ Մամուլյանը:

ՅՈՒՆԵՍԿՕ-ն նոյեմբերի 22-29-ի նիստում Բալի կղզում «Քեշքեկը» ընդգրկեց իր «Ոչ նյութական արժեքների» ցուցակում որպես թուրքական ազգային ճաշատեսակ՝ պատրաստված ցորենից և մսից, որը եփում են հարսանիքների և կրոնական տոների առիթով: Մամուլյանը նշեց, որ հարիսայի (կամ ինչպես թուրքերն են անվանում՝ քեշքեկ)  բացարձակապես բոլոր բաղադրիչներն ու պատրաստման տեխնոլոգիան բուն հայկական են:

«Հարիսայի ճանաչումը որպես թուրքական ճաշատեսակ հայկական կողմի ոչ բավարար ուշադրության արդյունքն է իր ազգային խոհանոցի պաշտպանության նկատմամբ»,- ասաց նա, հավելելով, որ հացահատիկայինների հիման վրա պատրատված հարիսան հայերի նստակյաց կենսակերպի պատմական ապացույցն է պատմության արդեն իսկ վաղ փուլում:

Փորձագետը կարծում է, որ Հայաստանը չպետք է հաշտվի յուրացման նմանատիպ փաստերի հետ, հակառակ դեպքում շուտով հայկական մշակույթի բոլոր տարրերը կվերագրվեն այլ ազգերի: Նա ընդգծեց նաև, որ, ի հակառակ թյուր կարծիքի՝ «տարածաշրջանային խոհանոց» հասկացություն գոյություն չունի:

«Հայկական խոհարարական ավանդույթների պահպանում և զարգացում» հասարակական կազմակերպության քարտուղար Վահե Աթանեսյանն իր հերթին ասաց, որ կազմակերպությունը մտադիր է բողոքարկել ՅՈՒՆԵՍԿՕ-ի որոշումը հարիսան թուրքական խոհանոցի ցուցակում ընդգրկելու վերաբերյալ: «Մենք որոշակի աշխատանքներ ենք տանում հարիսայի բաղադրիչների պատմության տրամադրման ուղղությամբ համապատասխան պետական մարմիններին ՅՈՒՆԵՍԿՕ-ում հետագա բողոքարկման համար»,- ասաց նա:

Գրող Լիա Ավետիսյանն իր հերթին նշեց, որ խոհանոցը ժղովրդի մշակույթի և պատմության մասնիկն է, այդ իսկ պատճառով «չպաշտպանելով հայկական խոհանոցի ժառանգությունը՝ մենք խոցելի ենք դարձնում նաև մեր պատմությունը»:

Այս առիթով նա նշեց, որ Հայաստանի մշակույթի նախարարությունը պետք է ավելի կոմպետենտ կերպով կատարի իր պարտականությունները հայ ժողովրդի մշակութային արժեքների պաշտպանության և ներկայացման տեսանկյունից: -0-