ԵՐԵՎԱՆ, 25 նոյեմբերի. /Նովոստի-Արմենիա/. ՀԱՊԿ գլխավոր քարտուղար Նիկոլայ Բորդյուժան և ՀՀ ԱԱԽ քարտուղար Արթուր Բաղդասարյանը ՀԱՊԿ շրջանակներում տեղի ունեցած հանդիպումների և բանակցությունների ընթացքում Հայաստանի կողմից ձեռք բերված պայմանավորվածությունների կատարման ծրագիր են ստորագրել ուրբաթ Երևանում:
«Ծրագրում գերակայում են Հայաստանին հետաքրքրող թեմաները, այդ թվում նաև ռազմատնտեսական համագործակցությունը, ռազմատեխնիկական ոլորտում համատեղ սերվիսային ձեռնարկությունների ստեղծման հնարավորությունը, տեղեկատվական անվտանգության հետ կապված հարցերը», - ասել է Բորդյուժան փաստաթղթի ստորագրման ընթացքում:
Նա նշել է, որ ՀԱՊԿ-ի ղեկավարության հետ ՀՀ ԱԱԽ-ի կապերը խորը բնույթ ունեն, ինչպես Ռուսաստանի, այնպես էլ Հայաստանի անվտանգության ապահովմանն ուղղված համատեղ գործունեության խորացման պայմանավորվածություններ են ձեռք բերվել՝ ՌԴ-ի և Հայաստանի անվտանգության խորհուրդների ներուժի մասնակցությամբ և օգտագործմամբ:
Բորդյուժան նաև նշել է, որ ծրագրում մեծ ուշադրության է արժանացել ՀԱՊԿ ԱԱՀՈւ զորավարժություններին նախապատրաստվելու հարցը, որոնք նախատեսվում է անցկացնել Հայաստանում 2012 թ.-ին:
«Հենց դա է պատճառը, որ ՀԱՊԿ քարտուղարությունից՝ գլխավոր քարտուղարի տեղակալ Սեմերիկովի գլխավորությամբ, այստեղ մեծ աշխատանքային խումբ է ժամանել, որը մի քանի օրվա ընթացքում աշխատել է ուժային կառույցների ներկայացուցիչների հետ՝ զորավարժությունների սցենարը և որ ամենակարևորն է՝ նրանց պատրաստման ծրագիրը մշակելու համար», - ասել է նա:
Գլխավոր քարտուղարի խոսքերով՝ փաստաթղթում նաև ներառված են մի շարք միջոցառումներ, որոնք թույլ կտան ավելի արդյունավետ կերպով օգտագործել ՀԱՊԿ-ի ներուժը՝ Հայաստանի անվտանգության ապահովման նպատակով:
«Ես անձամբ շատ գոհ եմ, որ նման համագործակցությունը շատ ամուր է: ՀԱՊԿ-ի քարտուղարության և ՀՀ ԱԱԽ-ի ղեկավարող կազմի հետ նմանատիպ հանդիպումների անցկացումը թույլ է տալիս գտնել հարցեր, որոնք լուծվում են բավականին ակտիվ կերպով, ինչպես նաև թույլ է տալիս կրկնակի ճնշում գործադրել այն ուղղությունների վրա, որոնք առավել կարևոր և առաջնահերթ են՝ Հայաստանի անվտանգության ապահովման համար», - ընդգծել է Բորդյուժան:
Արթուր Բաղդասարյանն իր հերթին նշել է, որ 2012 թ.-ին ստորագրված փաստաթղթի համաձայն՝ ՀԱՊԿ-ի համագործակցության շրջանակներում 15 միջոցառում կանցկացվի Երևանում և Մոսկվայում, որոնք վերաբերում են համագործակցության հարցերի լայն շրջանակին:
«Մենք չափազանց կարևորում ենք 2012 թ.-ին նախատեսված ԱԱՀՈւ հատուկ ստորաբաժանումների զորավարժությունները, և ըստ ստորագրված ծրագրի՝ Երևանում և Մոսկվայում կիրականացվեն կարևորագույն միջոցառումներ, որոնք ուղղված են ՀԱՊԿ-ի շրջանակներում մեր համագործակցության կատարելագործմանը, ինչի վերջնական նպատակն է բարձրացնել մեր երկրի անվտանգության մակարդակը», - ասել է նա:
Բաղդասարյանը նաև նշել է, որ ծրագրում ամրագրված պայմանավորվածությունների արդյունավետ կատարման դեպքում համագործակցությունը շատ ավելի արդյունավետ կզարգանա:
ՀԱՊԿ-ն ստեղծվել է ԱՊՀ անդամ-երկրների կողմից 1992 թ.-ի մայիսի 15-ին ստորագրված Հավաքական անվտանգության պայմանագրի հիման վրա: ՀԱՊԿ-ի կազմում ներառված են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանն ու Ուզբեկստանը:-0-
