Մասնագետները կանխել են Հայաստանի հյուսիսում թեյլերիոզ հիվանդության տարածումը. Գյուղնախարարություն

ԵՐԵՎԱՆ, 23 նոյեմբերի. /Նովոստի-Արմենիա/. ՀՀ գյուղատնտեսության նախարարության մասնագետները ՀՀ Լոռու մարզում կանխել են թեյլերիոզի (խոշոր եղջերավոր անասունի հիվանդություն) հետագա տարածումը և իրավիճակը հսկողության տակ են վերցրել, հաղորդում է գերատեսչության մամուլի ծառայությունը:

Հաղորդագրության համաձայն, Լոռու մարզի Կաթնառատ համայնքում անհայտ հիվանդությունից անասունների անկման դեպքերի մասին մի շարք հայկական ԶԼՄ-ների տեղեկատվությունից հետո, ՀՀ գյուղատնտեսության նախարարության մասնագետները եղել են տեղում, ուսումնասիրել հիվանդության տարածվածության և բնույթի հանգամանքները:

Թեյլերիոզը եղջերավոր կենդանիների տրանսմիսիվ հիվանդություն է: Թեյլերիոզ հարուցիչի նկատմամբ ընկալունակ են համարվում խոշոր և մանր եղջերավոր կենդանիները:

Հիվանդանում են բոլոր տարիքի և ցեղի կենդանիները, հատկապես ծանր ընթացք է ունենում 6 ամսական հորթերի մոտ: Հիվանդության փոխանցողները հիմնականում տիզերն են, որոնք առավել ակտիվ են մայիս-հուլիս ամիսներին: Հիվանդությունը չի անցնում մարդուն: -0-