Հայաստանում 2012 թ.-ի աշնանը Զբոսաշրջությանը նվիրված միջազգային նախարարական գագաթնաժողով կանցկացվի

Հայաստանում 2012 թ.-ի աշնանը Զբոսաշրջությանը նվիրված միջազգային նախարարական գագաթնաժողով կանցկացվի, ուրբաթ լրագրողներին ասաց ՀՀ էկոնոմիկայի փոխնախարար Արա Պետրոսյանը:

Նրա խոսքերով՝ համապատասխան որոշում է ընդունվել ՄԱԿ-ի Զբոսաշրջության համաշխարհային կազմակերպության (UNWTO) հերթական նիստի ժամանակ, որը տեղի է ունեցել հոկտեմբերի 8-14-ը Կորեայում, որտեղ քննարկվել են նաև կայանալիք նիստի մանրամասները:

«Հայաստանն այս դեպքում հանդես է գալիս որպես կազմակերպիչ, միջազգային հարթակ գագաթնաժողովի անցկացման համար, նույնիսկ նախնական պայմանավորվածություն կա նիստի արդյունքում Երևանյան հռչակագրի կնքման մասին», - մեջբերում է Պետրոսյանի խոսքերը «ԱՌԿԱ» լրատվական տեղեկատվական գործակալությունը:

Նա նշել է, որ Հայաստանում նման խոշոր նիստի անցկացումը էականորեն կբարձրացնի երկրի հեղինակությունը, ինչպես նաև թույլ կտա միջազգային շուկայում ներկայացնել գոյություն ունեցող տուրիստական ներուժն ու բարձրացնել երկրի ընդհանուր վարկանիշը:

Ինչպես տեղեկացրեց փոխնախարարը, Հայաստանն իր ենթակառուցվածքներով պատրաստ է միջազգային միջոցառումների անցկացմանն այդ թվում նաև «Զվարթնոց» օդանավակայանի նորակառույց տերմինալի հաշվին:

Նախատեսվում է, որ UNWTO-ի 150 անդամ-երկրներից Երևանում կայանալիք գագաթնաժողովին կմասնակցի պատվիրակությունների շուրջ 60-70 տոկոսը՝ 2-3 մարդուց բաղկացած կազմով, ովքեր միջոցառումից հետո կկարողանան ծանոթանալ Հայաստանի տեսարժան վայրերի հետ:

ՄԱԿ-ի Զբոսաշրջության համաշխարհային կազմակերպությունը (UNWTO) ՄԱԿ-ի մասնագիտացված գործակալությունն է և տուրիզմի ոլորտում միջազգային առաջատար կազմակերպույուն: UNWTO-ն վճռորոշ դեր է խաղում զբոսաշրջության առաջխաղացման, զարգացման, կենսունակության և ունիվերսալ հասանելիության հարցում: UNWTO-ի կազմում ընդգրկված է 154 երկիր և ավելի քան 400 մասնաճյուղային անդամ:

Հայաստանը 1997 թ.-ից UNWTO-ի լիիրավ անդամ է:-0-