Փարիզը ստիպված կլինի դիմել Հայոց ցեղասպանության ժխտման քրեականացմանը, եթե Թուրքիան հրաժարվի ճանաչել այն, հինգշաբթի լրագրողներին հայտարարեց Ֆրանսիայի նախագահ Նիկոլա Սարկոզին Հայոց ցեղասպանության հուշահամալիր այցելելուց հետո:
«Կոլեկտիվ ժխտումն անհատական ժխտումից ավելի լուրջ է: Եթե Թուրքիան չճանաչի Հայոց ցեղասպանությունը, ապա մենք Ֆրանսիայում ստիպված կլինենք դիմել այլ նախաձեռնությունների, այդ թվում՝ ցեղասպանության ժխտման քրեականացմանը», - ասաց Սարկոզին:
Հինգշաբթի պետական այցով Հայաստան ժամանած Ֆրանսիայի նախագահը ծաղկեպսակ է դրել Հայոց ցեղասպանության զոհերի հուշահամալիրին:
Սարկոզիի հետ միասին հուշահամալիր են այցելել ՀՀ նախագահ Սերժ Սարգսյանը, ՀՀ ԱԳ նախարար Էդվարդ Նալբանդյանը: Ֆրանսիայի նախագահին ուղեկցել է ֆուտբոլի աշխարհի և Եվրոպայի չեմպիոն Յուրի Ջորկաեֆը:
Սարկոզին ծանոթացել է Հայոց ցեղասպանության թանգարան-ինստիտուտի ցուցանմուշներին՝ պատվավոր հյուրերի գրքում կատարելով գրառում՝ «Ֆրանսիան չի մոռանում»: Այնուհետև նա եղևնի է տնկել Հիշատակի ծառուղում:
Ֆրանսիան 2001 թ.-ին խորհրդարանի մակարդակով ճանաչել է Օսմանյան կայսրությունում տեղի ունեցած Հայոց ցեղասպանությունը, սակայն Ցեղասպանության ժխտման համար քրեական պատասխանատվության ենթարկելու մասին օրինագիծը դեռևս ընդունված չէ Սենատի կողմից:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ։ Առաջինը 1965 թ.-ին ճանաչել է Ուրուգվայը, որի օրինակին են հետևել Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, ԱՄՆ-ի 42 նահանգները։ Հայոց ցեղասպանությունը ճանաչել են նաև Վատիկանը, Եվրախորհրդարանը, Եկեղեցիների համաշխարհային խորհուրդը։-0-
