Ռոդ Այլընդ նահանգում նշել են ՀՀ անկախության հոբելյանը

Հայաստանի անկախության հռչակման 20-ամյակը նշել են նախորդ շաբաթ օրը Ռոդ Այլընդ նահանգի Պրովիդենս քաղաքում «Ողջույն Հայաստան» խորագրով համերգի շրջանակներում:

Ըստ հաղորդագրության, ի թիվս 1000-ից ավելի մասնակիցների` համերգին ներկա են եղել ԱՄՆ սենատոր Շելդոն Վայթհաուզը, Ռոդ Այլընդի քաղաքապետներ, մունիցիպալ իշխանության և հայ համայնքի ներկայացուցիչներ:

Համերգը, որը ղեկավարում էր ամերիկաբնակ դիրիժոր Կոնստանտին Պետրոսյանը, անցկացվել է ՄԱԿ-ում և ԱՄՆ-ում ՀՀ դիվանագիտական ներկայացուցչությունների հովանու ներքո:
Համերգի շրջանակներում Ռոդ Այլընդի Ֆիլհարմոնիայի սիմֆոնիկ նվագախմբի և նահանգի հայ համայնքի երգչախմբերի կատարմամբ հնչել են Կոմիտասի, Արամ Խաչատրյանի, Առնո Բաբաջանյանի, Սամուել Վարդի և այլոց ստեղծագործությունները:  
ՄԱԿ-ում ՀՀ մշտական ներկայացուցիչ Կարեն Նազարյանը միջոցառման շրջանակներում ելույթի ժամանակ կարևորել է սփյուռքի դերը Հայաստանի անկախության ամրապնդման հարցում:

Անդրադառնալով երկրի արտաքին քաղաքականության ուղղություններին` Նազարյանը նշել է, որ ցեղասպանության ճանաչումը և կանխարգելումը, տարածաշրջանային խաղաղության պահպանումը Հայաստանի համար համարվում են կարևորագույն խնդիրներ, որոնց լուծման հարցում էական է գործընկեր պետությունների հետ բազմակողմ համագործակցությունը:

Դեսպան Նազարյանն ավելացրել է, որ ՄԱԿ-ում Հայաստանն ակտիվորեն ներգրավված է սոցիալական, տնտեսական, կայուն զարգացման, ինչպես նաև անդրազգային հանցագործության` այդ թվում ահաբեկչության դեմ պայքարի հարցերի քննարկմանը:
Նա նշել է, որ այդ բնագավառում ՀՀ ջանքերը և քայլերը կարևորվում և գնահատվում են միջազգային հանրության կողմից:-0-