Երևանի «Մուրացան» բժշկական կենտրոնում մահացած նորածնի դիահերձումը նշանակվել է սեպտեմբերի 6-ին, երկուշաբթի «Նովոստի-Արմենիա» գործակալությանը հաղորդեցին հանրապետության Առողջապահության նախարարության մամուլի ծառայությունից։
Վայք քաղաքի ծննդատանը ծնված երեխայի մահը մեծ աղմուկ է առաջացրել։ Նորածնի հարազատները բժիշկներին մեղադրում են մասնագիտական անփութության մեջ։
«Առավոտյան երեխայի մարմինը տեղափոխվել է Մանկական ախտորոշիչ անատոմիական կենտրոն դիահերձում անցկացնելու համար»,- նշվում է հաղորդագրության մեջ։
«Հաշվի առնելով, որ դեպքը իրավապահ մարմինների վարույթում է, և այդ կապակցությամբ նյութերը գտնվում են նախնական քննության փուլում, օրենսդրությունը պահանջում է մահվան դեպքի ուսումնասիրություն` դատաբժշկական փորձաքննության ճանապարհով, որի իրականացումը հնարավոր է գործը վարող մարմնի, տվյալ դեպքում Վայքի քննչական բաժնի համապատասխան որոշմամբ: Վերջինը, ըստ նախնական պայմանավորվածության, կստանանք առաջիկա ժամերին: Դիահերձումը կկազմակերպվի վաղը»,- նշվում է հաղորդագրության մեջ։
Միաժամանակ նշվում է, որ ՀՀ Քրեական դատավարության օրենսգրքի պահանջներին համապատասխան` առողջապահության նախարարությունը իրավասու է նախնական քննության տվյալները հրապարակել միայն գործի վարույթն իրականացնող մարմնի թույլտվությամբ:
Հաղորդագրության համաձայն, հանձնաժողովը` ՀՀ ԱՆ Առողջապահական ծրագրերի և որակի կառավարման վարչության պետ Կարեն Կոստանյանի ղեկավարությամբ, գտնվում է Վայքի ծննդատանը դեպքի հետ կապված հանգամանքները տեղում պարզելու և բուժհաստատությունում մանկաբարձագինեկոլոգիական ծառայության վիճակը գնահատելու նպատակով: -0-
