ԵՐԵՎԱՆ, 5 սեպտեմբերի. /Նովոստի-Արմենիա/. Հայաստանի նախագահ Սերժ Սարգսյանը ներկա է գտնվել արտակարգ իրավիճակների համակարգի ձևավորման 20-ամյակին և արտակարգ իրավիճակների աշխատողի օրվան նվիրված հանդիսավոր շքերթին:
Միջոցառման շրջանակներում կազմակերպվել է ցուցադրություն՝ ՀՀ ԱԻՆ մարզային և մասնագիտաված ստորաբաժանումների մասնակցությամբ: Հանդիսությանը ներկա էին նաև ՀՀ վարչապետ Տիգրան Սարգսյանը, Ազգային անվտանգության խորհրդի քարտուղար Արթուր Բաղդասարյանը, գլխավոր դատախազ Աղվան Հովսեփյանը, տարբեր գերատեսչությունների ղեկավարներ, ՀՀ ԱԺ-ի և կառավարության ներկայացուցիչներ:
Իր խոսքում ՀՀ ԱԻՆ ղեկավար Արմեն Երիցյանը նշել է, որ պետական մարմնի ստեղծման անհրաժեշտությունը, որը կհամակարգեր արտակարգ իրավիճակներից Հայաստանի բնակչության պաշտպանության ոլորտը, թելադրված էր 1988 թ.-ի Սպիտակի երկրաշարժի ծանր հետևանքներով:
1991 թ.-ի հուլիսի 14-ին ՀՀ կառավարության որոշմամբ սեյսմիկ պաշտպանության ազգային ծառայություն է ստեղծվել, իսկ նույն թվականի դեկտեմբերի 4-ին ստեղծվել է ՀՀ կառավարությանն առընթեր արտակարգ իրավիճակների պետական վարչությունը: Սեպտեմբերի 4-ը՝ Հայաստանում առաջին պետական փրկարար ջոկատի ստեղծման օրը, նշվում է որպես արտակարգ իրավիճակների համակարգի աշխատողի օր:
«Մեր այսօրվա զարգացումը համահունչ է համաշխարհային միտումներին և մարտահրավերներին», - ասել է Երիցյանը:
Նրա խոսքերով՝ բնական աղետների ռիսկի նվազեցման արդյունավետ և գործնական համակարգի ձևավորումը կարևոր է երկրի համար ոչ միայն ռիսկերի և աղքատության մակարդակի նվազեցման, բնապահպանական խնդիրների լուծման, այլև երկրի կայուն զարգացման տեսակետից:
«Որպես նախարար՝ վստահեցնում եմ, որ մեր համակարգը բավականին մասնագիտացած և հմտացած է, որպեսզի Հայաստանը լինի կայուն աղետների նկատմամբ», - ասել է ԱԻՆ ղեկավարը:
Հանդիսավոր քայլերթից հետո տեղի է ունեցել ԱԻՆ Ճգնաժամային կառավարման նոր կենտրոնի բացումը: Վերանորոգված, նորագույն տեխնոլոգիաներով համալրված կենտրոնը թույլ կտա ավելի արդյունավետ կազմակերպել ճգնաժամային իրավիճակների կառավարումը:
Հանդիսավոր միջոցառումը կշարունակվի երեկոյան Ալեքսանդր Սպենդիարյանի անվան օպերայի և բալետի ազգային ակադեմիական թատրոնում, որտեղ տոնական համերգ կկազմակերպվի:-0-
