Առաջինդասարանցու համար անհրաժեշտ հագուստի և դպրոցական պարագաների գնման նվազագույն ծախսերը Երևանում կազմում են 17 հազար դրամ (ավելի քան 46 դոլար), երեքշաբթի լրագրողներին ասաց «Սոցիոմետր» սոցիոլոգիական հետազոտությունների կենտրոնի տնօրեն Ահարոն Ադիբեկյանը։
«Կենտրոնի աշխատակիցները ծանոթացան Երևանի մի շարք շուկաների և ոչ թանկ խանութների տեսականու հետ և պարզեցին, որ առաջինդասարանցու կոշիկի նվազագույն արժեքը 4 հազար դրամ է (մոտ 11 դոլար), հագուստը (կիսաշրջազգեստը կամ տաբատն ու վերնաշապիկը)՝ 3 հազար դրամ (մոտ 8 դոլար), պայուսակն արժե 4 հազար դրամ, դպրոցական պարագաները՝ 3 հազար»,- ասաց սոցիոլոգը՝ հավելելով, որ ևս 3 հազար դրամ էլ պահանջվում է այլ մանր ծախսերի համար։
Բացի այդ, սոցիոլոգի խոսքով, առաջինդասարանցու համար գրասեղանը կարժենա մոտ 25 հազար դրամ (մոտ 67,9 դոլար), իսկ բջջային հեռախոսը՝ նվազագույնը 13 հազար դրամ (մոտ 35,3 դոլար)։
«Այսօր ծնողների մեծամասնությունը երեխաների համար բջջային հեռախոսներ է գնում, որպեսզի միշտ կապի մեջ լինեն»,- նշեց Ադիբեկյանը։
Այսպիսով, երեխային դպրոցի պատրաստելը ընդհանուր առմամբ կազմում է 55 հազար դրամ, ինչը սոցիոլոգի հաշվարկներով, կազմում է ամսական միջին աշխատավարձի մոտ կեսը։
«Սա մեծ ծանրություն է ընտանեկան բյուջեի համար, քանի որ Հայաստանի բնակչության միայն 15 տոկոսն է ապահով ապրում, մնացած 85 տոկոսը նյութական տարբեր դժվարություններ է կրում։ Ավելի պրակտիկ ծնողներն անհրաժեշտ ապրանքները գնում են տարվա ընթացքում, սակայն, մեծամասնությունն անում է դա վերջին պահին»,- ընդգծեց նա։
Հայաստանի ազգային վիճակագրական ծառայության տվյալներով՝ երկրում ընթացիկ տարվա հուլիսին ամսական անվանական միջին աշխատավարձը կազմել է 120,8 հազար դրամ (մոտ 330 դոլար)՝ աճելով 2010 թվականի հուլիսի համեմատ 6,7 տոկոսով։ -0-
