Հնագույն ձեռագրերի երևանյան ինստիտուտի՝ «Մատենադարանի» նոր մասնաշենքի, ինչպես նաև Զվարթնոց» օդանավակայանի նոր տերմինալի բացումը նվիրված կլինի Հայաստանի անկախության 20-ամյակին, հինգշաբթի լրագրողներին ասաց ՀՀ նախագահի աշխատակազմի ղեկավարի տեղակալ, տոնական միջոցառումների նախապատրաստման և կազմակերպման աշխատանքների համակարգող Վիգեն Սարգսյանը:
«Մեր ամենամեծ հպարտությունը «Մատենադարանի» նոր մասնաշենքի բացումն է: Այն երեք անգամ գերազանցում է ներկայիս շենքի չափը, համալրված է ժամանակակից տեխնիկայով և համապատասխանում է ձեռագրերի պահպանման ամենաբարձր պահանջներին ինչպես օդորակման, այնպես էլ անվտանգության ապահովման տեսակետից», - ասաց Սարգսյանը:
Նրա խոսքերով՝ «Մատենադարանի» հիմնական շենքում վերանորոգման աշխատանքներ կսկսվեն, որոնք նախատեսվում է ավարտել մինչև 2012 թ.-ի գարունը:
«Այն տարում, երբ Երևանը կլինի գրքի համաշխարհային մայրաքաղաք, հիմնական շենքը կդառնա ցուցահանդեսային համալիր, այսինքն` եթե ավելի վաղ կար միայն մեկ ցուցասրահ, որտեղ տեղադրվում էր ձեռագրերի միայն փոքր մասը, ապա այժմ մենք կունենանք թանգարան, որն արժանի է Մատենադարանում պահվող հավաքածուին», - նշեց նա:
«Բացի այդ, հեծանվահրապարակ է բացվում, իսկ «Փոքր Մհեր» կրթահամալիրը նոր ռազմամարզական կենտրոն կստանա, որտեղ կկարողանան մարզվել կրթահամալիրի սաները», - ավելացրեց Սարգսյանը:
Հայաստանի Գերագույն խորհրդի որոշմամբ` 1991թ. սեպտեմբերի 21-ին հանրաքվե անցկացվեց՝ ԽՍՀՄ կազմից դուրս գալու և անկախ պետականություն հաստատելու վերաբերյալ։ Ընտրելու իրավունք ունեցող քաղաքացիների 94,99%-ը կողմ էր քվեարկել:
Երկու օր անց հանրապետության Գերագույն Խորհուրդը Հայաստանը հռչակեց անկախ, ինքնիշխան հանրապետություն:-0-
