Քաղաքականության մեջ կնոջ դերը մեծ նշանակություն ունի երկրի զարգացման համար. պատգամավոր
Քաղաքականության մեջ կնոջ դերը մեծ նշանակություն ունի երկրի զարգացման համար, հինգշաբթի լրագրողներին ասաց «Ժառանգություն» խորհրդարանական ընդդիմադիր խմբակցության անդամ Անահիտ Բախշյանը:
«Ուժեղ և խելացի կին-քաղաքական գործիչները կկարողանան երկրում լուրջ փոփոխություններ ապահովել», - ասաց Բախշյանը:
Նրա կարծիքով՝ կինը ավելի պակաս է հակված կոռուպցիայի, և հայկական հասարակության մեջ կին-ղեկավարի կերպարը շատ ավելի քիչ է ասոցացվում կաշառակերի կերպարի հետ:
«Սակայն այսօր երկրում կան բազմաթիվ արհեստական արգելքներ, որոնք խոչընդոտում են կնոջ մուտքը մեծ քաղաքականություն: Կինը հաճախ անվստահություն է զգում քաղաքական դաշտում», - կարծում է պատգամավորը:
Դաշնակցություն խմբակցության անդամ Լիլիթ Գալստյանն իր հերթին նշեց, որ Հայաստանը «տղամարդկանց մշակույթի» երկիր է: «Հայաստանի Սահմանադրությամբ հաստատված է սեռերի իրավահավասարություն, սակայն փաստացի այն բացակայում է», - կարծում է նա:
Պատգամավորի կարծիքով՝ այս հարցի լուծմանը պետք է ոչ միայն մեխանիկորեն մոտենալ՝ ընդունելով նոր օրենքներ, այլև պետք է քաղաքական և հասարակական գիտակցության մեջ ամրագրել բոլոր ոլորտներում կանանց դերի կարևորությունը:
«Հայաստանում ավանդականությունը կնոջը սոցիալական մարգինալացման մեջ է մտցրել: Երբ երկրում բացակայում է սեռերի իրավահավասարության մասին քաղաքական գիտակցությունը, ապա հարկավոր է այդ իրավահավասարությունն ամրագրել օրենսդրական մակարդակով: Դա վերաբերում է նաև երկրի Ընտրական օրենսգրքին», - նշեց պատգամավորը:
«Այսօր համաշխարհային քաղաքականության մեջ գերիշխում է ֆեմինիստական տրամադրվածությունը, քանի որ շահում է այն հասարակությունը, որն իսկապես օգտագործում է կնոջ ներուժն ու հնարավորությունները», - ավելացրեց Գալստյանը:-0-
