Ադրբեջանի ղեկավարը շարունակում է անտեսել իր պարտավորությունները միջազգային հանրության և միջնորդների առջև՝ ցինիկ կերպով գործելով այն փաստաթղթերին ի հակառակ, որոնք հենց ինքն է ստորագրել Մայնդորֆում և Աստրախանում, ասաց Հայաստանի ԱԳ փոխնախարար Շավարշ Քոչարյանը՝ մեկնաբանելով նախօրեին Ադրբեջանի նախագահ Իլհամ Ալիևի արած սադրիչ հայտարարությունները։
Նախօրեին հանդես գալով ԼՂՀ-ում ոչնչացված ադրբեջանցի դիվերսանտներին հրաժեշտի արարողությանը, որոնց մարմինները ուրբաթ հանձնվել էին ադրբեջանական կողմին, Ադրբեջանի նախագահը հերթական անգամ հայտարարել է ղարաբաղյան խնդրի ռազմական լուծման հնարավորության մասին։ Ալիևը կրկնել է նաև ադրբեջանական քարոզչության կլիշեն այն մասին, որ ներկայիս հայկական պետությունն իբր «պատմական ադրբեջանական հողերում» է կազմավորվել։
«Ալիևին ձեռք չի տալիս պատմությունը, որը նա դասավանդել է ՄՀՄՊԻ-ում, և նա ստեղծում է իր կեղծ պատմությունը։ Նա անտեսում է ժամանակակից միջազգային իրավունքը և փորձում է հանդես գալ ուժի իրավունքի չկայացած դիրքերից»,- նշեց Հայաստանի ԱԳՆ ղեկավարի տեղակալը։
Քոչարյանի խոսքերով՝ աստրախանյան հռչակագիրը վստահության քայլերի արմապնդում է ենթադրում գերիների և զոհվածների մարմինների փոխանակման միջոցով, սակայն Իլհամ Ալիևն այդ գործընթացը հակառակ կերպով է օգտագործում՝ լարվածության ավելացման համար։
Հոկտեմբերի 27-ին Հայաստանի, Ռուսաստանի և Ադրբեջանի նախագահների հանդիպման ընթացքում պայմանավորվածություն է ձեռք բերվել Բաքվի և Երևանի միջև գերիների և զոհվածների մարմինների փոխանակման վերաբերյալ։
«Ալիևների ժառանգական ռեժիմը արյամբ սնվելու կարիք է զգում, այդ թվում՝ սեփական ժողովրդի արյամբ։ Նրան բավարար չեն իր իսկ ծավալած ագրեսիայի հետևանքները, որոնցով նա արբենում է՝ ձգտելով սեփական ժողովուրդին դեպի նոր հորձանուտներ մղել՝ զբաղվելով նոր արյունահեղության սադրանքով և շարունակելով ադրբեջանական հասարակությանը սեփական հիվանդագին պատրանքների պատանդ դարձնել»,- նշեց Քոչարյանը։
Նա նշեց, որ Ալիևը շարունակում է մահվան ուղարկել դիվերսանտների, ովքեր, ըստ նրա, նախապես գիտեին, որ կենդանի չեն վերադառնա, հանդիսավոր թաղում է նրանց և միաժամանակ թաղում է փոխզիջումների միջոցով հակամարտության կարգավորման հնարավորությունը։
«Միանշանակ, հակահայկական հիստերիայի նոր ալիքը սկսվեց խորհրդարանում Ալիևների կլանի ներկայացուցիչների «ընտրությունների» օրը՝ միջնադարյան խանության ձաևվորման հերթական փուլից ուշադրությունը շեղելու նպատակով»,- ասաց Քոչարյանը։
«Ալիևն ինքն իրեն ընտրության առջև է կանգնեցրել. կամ հրաժարում միջնադարյան խավարամտությունից՝ կառուցված կեղծիքի, հարևան ժողովուրդների նկատմամբ ատելության և զենք ճոճելու ինքնասպան փորձերի վրա, կամ Ադրբեջանի ինքնամեկուսացում և վերջնական անկում դեպի խորը միջնադար՝ քաղաքական, հոգեբանական և մարդասիրական անխուսափելի աղետով»,- ասաց ԱԳՆ ղեկավարի տեղակալը։
2008թ. նոյեմբերի 2-ին Մայնդորֆում կայացած եռակողմ հանդիպման ժամանակ Հայաստանի, Ռուսաստանի և Ադրբեջանի նախագահները ստորագրեցին մի հռչակագիր: Երեք երկրների ղեկավարները պայմանավորվեցին համատեղ աշխատել Կովկասում իրավիճակն առողջացնելու ուղղությամբ, ինչպես նաև հանձնարարեցին արտգործնախարարներին շարունակել աշխատանքները ղարաբաղյան հակամարտությունը կարգավորելու ուղղությամբ:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
