ԵԱՀԿ-ի՝ Տավուշի մարզի Բերքաբեր գյուղի մոտ հայ-ադրբեջանական շփման գծի չորեքշաբթի անցկացրած դիտարկումն անցել է առանց միջադեպերի, հաղորդում է «Նովոստի-Արմենիա» գործակալության թղթակիցը Բերքաբերից:
Հայկական կողմից դիտարկմանը մասնակցել են ԵԱՀԿ գործող նախագահի անձնական ներկայացուցչի դաշտային օգնականներ Իմրե Պալատինուսն ու Ժեսլան Նուրտազինը:
Ինչպես լրագրողներին հայտարարեց ՀՀ ԶՈւ Գլխավոր շտաբի օպերատիվ վարչության ավագ սպա, փոխգնդապետ Սամվել Ասատրյանը, դիտարկման ընթացքում երկու կողմերի հրամանատարները քննարկել են շփման գծում գրանցված փոխհրաձգությունների հետ կապված հարցերը:
Դիտարկումը սկսվել է տեղական ժամանակով ժամը 11:45-ին և տևել է տասը րոպե: Վիզուալ կոնտակտը տեղի է ունեցել 1400 մետր հեռավորության վրա:
Մինչ դիտարկման մեկնարկը ԵԱՀԿ-ի ներկայացուցիչները հանդիպել են Տավուշի մարզպետի տեղակալ Վահե Վարդապետյանի և հայկական զորամասի ղեկավարության հետ:
Հանդիպման ընթացքում հայ զինվորականները տեղեկացրել են ԵԱՀԿ-ի ներկայացուցիչներին շփման գծում տիրող իրավիճակի մասին՝ հայտնելով, որ գնդակոծությունների ժամանակ ադրբեջանական կողմն օգտագործում է մեծ տրամաչափի զենք, մասնավորապես՝ գնդացիրներ և 14,7 մմ տրամաչափի դիպուկահար հրացաններ:
Միայն հոկտեմբերի ընթացքում Իջևանի հատվածում գրանցվել է հրադադարի ռեժիմի խախտման 37 դեպք (նախորդ տարվա համեմատ խախտման թիվը նվազել է):
Զորամասի ներկայացուցիչները տեղեկացրել են, որ ադրբեջանական կողմը գնդակոծությունները կազմակերպում է հայկական տարածքում ինժեներական աշխատանքների անցկացման ժամանակ, այն դեպքում, երբ հայկական կողմը ձեռնպահ է մնում նման գործողություններից:
Հայկական կողմն առաջարկել է մեկշաբաթյա դիտարկում անցկացնել՝ շփման գծում տիրող իրավիճակի մասին ավելի հստակ պատկերացում կազմելու համար:
Տավուշի մարզպետի տեղակալն իր հերթին նշել է, որ հրադադարի ռեժիմի խախտումները խոչընդոտներ են ստեղծում գյուղատնտեսական աշխատանքների անցկացման ժամանակ: Վարդապետյանը կարևորել է դիտարկման անցկացումը հենց գյուղատնտեսական աշխատանքների անցկացման ժամանակահատվածում:
Նախապես ծրագրվում էր դիտարկումն անցկացնել Կիրանց-Մազամլի հատվածում, սակայն ադրբեջանական կողմի առաջարկվող դիտարկման վայրը փոխվել էր:-0-
