«Երիտասարդական միջոցառումների կազմակերպման կենտրոն» ՊՈԱԿ-ը հայտարարում է 10-16 տարեկան պատանիների համար գրված պատմվածքների մրցույթ։
Ինչպես տեղեկացնում են կազմակերպության մամուլի ծառայությունից, հեղինակների տարիքային սահմանափակում չկա։ «Աշխատանքների գնահատման համար կձևավորվի հատուկ հանձնաժողով: Հանձնաժողովի կողմից հավանություն ստացած լավագույն աշխատանքները կտպագրվեն առանձին գրքույկով»,- ասվում է հաղորդագրության մեջ:
Ծրագրի նպատակն է զարգացնել մանկապատանեկան գրականությունը, երեխաների մտահորիզոնը, ճաշակն ու գիտելիքները։
Ծրագիրը շարունակական է, աշխատանքները կարող են ներկայացնել հոկտեմբերի 27-ից (յուրաքանչյուր ամիս): Արդյունքները կամփոփվեն յուրաքանչյուր ամսվա վերջում: Հեղինակները կարող են մասնակցել մի քանի անգամ, լավագույնների հետ հետագայում կկնքվի աշխատանքային պայմանագիր:
Ինչպես նշվում է հաղորդագրության մեջ, մասնակիցներն աշխատանքները կարող են ուղարկել [email protected] էլեկտրոնային հասցեով: -0-
