Տարածաշրջանում առաջին փառատոնը՝ նվիրված Շոպենի 200-ամյակին, կանցկացվի Երևանում

Տարածաշրջանում Շոպենի 200-ամյակին նվիրված առաջին փառատոնը կանցկացվի նոյեմբերի 1-11-ը Երևանում՝ «Շոպենի տարին Հայաստանում» խորագրով, ուրբաթ լրագրողներին հայտնեց Հայաստանում Լեհաստանի արտակարգ և լիազոր դեսպան Զդիսլավ Ռաչինկսին:

2010թ.-ին լրանում է մեծ լեհ կոմպոզիտոր և երաժիշտ Ֆրեդերիկ Շոպենի 200-ամյակը: Այդ նշանավոր տարեթվի առթիվ, ՅՈՒՆԵՍԿՕ-ն Լեհաստանի խորհրդարանի հետ համատեղ 2010թ.-ը Շոպենի տարի է հայտարարել:

Փառատոնը կանցկացվի Մշակույթի նախարարության, Հայաստանում Լեհաստանի դեսպանատան և Կոմիտասի անվան Երևանի պետական կոնսերվատորիայի աջակցությամբ՝ առաջին տիկին Ռիտա Սարգսյանի բարձր հովանավորությամբ:

«Շոպենի 200-ամյակին նվիրված համերգներն անցկացվում են ամենուր, բայց նման մրցույթ և նման համերգաշար միայն Հայաստանում է անցկացվում»,- ասաց Ռաչինսկին:

Դեսպանը խորին շնորհակալություն հայտնելով ՀՀ մշակույթի նախարար Հասմիկ Պողոսյանին՝ նշեց, որ Հայաստանում Շոպենի արվեստի հանդեպ մեծ հետաքրքրությունը, ինչպես նաև երկրի Մշակույթի նախարարության արագ արձագանքը նպաստեցին այդ փառատոնի կազմակերպմանը:

Մշակույթի նախարարն իր հերթին երախտագիտություն հայտնեց ՀՀ-ում Լեհաստանի դեսպանատանը, ի դեմս՝ Զդիսլավ Ռաչինսկուն՝ նշելով, որ Հայաստանն ուրախ է նման փառատոնի անցկացմանը, քանի որ հայերը  բարձր համաշխարհային արվեստի հետ շփվելու, ինչպես նաև երկրի նոր տաղանդներին բացահայտելու ևս մեկ հնարավորություն են ստանում:

Ինչպես հայտնեց նախարարը, մրցույթին 12 շնորհալի դաշնակահարներ են մասնակցում: Փառատոնի դափնեկիրները 400, 300, և 200 հազար դրամական պարգև կստանան (շուրջ $1100, $830 և $550):

Փառատոնի բացումն ու փակումը տեղի կունենա Արամ Խաչատրյանի համերգային դահլիճում: Դափնեկիրների համերգը տեղի կունենա նոյեմբերի 9-ին Հայաստանի  Ազգային պատկերասրահում: -0-