Լևոն Արոնյանը զբաղեցրել է երկրորդ տեղը աշխարհի լավագույն շախմատիստների վարկանիշում

Հայ գրոսմայստեր Լևոն Արոնյանը իր անհատական վարկանիշով առաջ է անցել աշխարհի չեմպիոն Վիշվանաթան Անանդից և հոկտեմբերի 26-ին հրապարակված ՖԻԴԵ-ի վարկանիշի համաձայն՝ զբաղեցնում է երկրորդ տեղը աշխարհի լավագույն շախմատիստների ցանկում, հաղորդում է armchess.am կայքը:

Հոկտեմբերի 26-ին հրապարակված ցանկում առաջատարի դիրքը զբաղեցնում է նորվեգացի շախմատիստ Մագնուս Կառլսենը (վարկանիշը՝ 2811,5), նրան են հետևում Արոնյանը (2801,4), Անանդը (2801,0), ռուս շախմատիստ Վլադիմիր Կրամնիկը (2790,6) և բուլղարացի շախմատիստ Վեսելին Տոպալովը (2772,4):

Հերթական պաշտոնական վարկանիշը ՖԻԴԵ-ն կհրապարակի նոյեմբերի 1-ին:

Հոկտեմբերի 17-23-ը Պլովդիվում կայացած Եվրոպայի թիմային առաջնության արդյունքում Երևանի «ՄԻԿԱ» շախմատի ակումբում հանդես եկող Արոնյանը առաջին խաղատախտակի վրա ցույց է տվել լավագույն ժամանակը և արժանացել ոսկե մեդալի: Անհատական հաշվարկով բրոնզե մեդալի է արժանացել հայկական ակումբի մեկ այլ մասնակից՝ Զավեն Անդրեասյանը:

Մեդալների են արժանացել նաև «ՄԻԿԱ» ակումբի կանանց թիմի անդամները՝ Լիլիթ Գալոյանն արժանացել է ոսկե մեդալի, իսկ Խարիկա Դրոնավալին (Հնդկաստան) և Լիլիթ Մկրտչյանն արժանացել են արծաթե մեդալների:

Երևանի «ՄԻԿԱ» ակումբի կանանց թիմը զբաղեցրել է երրորդ տեղը Բուլղարիայում անցկացված Եվրոպայի 2010 թ.-ի թիմային առաջնության արդյունքում: Տղամարդկանց թիմի արդյունքներն ավելի համեստ են, նրանք զբաղեցրել են 11-րդ տեղը, հաղորդվում է առաջնության պաշտոնական կայքում:-0-