ՀՀ կրթության և գիտության նախարար Արմեն Աշոտյանը երկուշաբթի Երևանի ավագ դպրոցների 254 ուսուցչի որակավորման բարձրացման դասընթացների 2-րդ փուլի ավարտման վկայականներ է շնորհել՝ Համաշխարհային բանկի «Կրթության որակ և համապատասխանություն» ծրագրի շրջանակներում։
Որակավորման բարձրացման դասընթացները կազմակերպվել էին սեպտեմբերի 13-ից հոկտեմբերի 9-ը Աբովյանի անվան հայկական պետական մանկավարժական համալսարանում՝ «Հայոց լեզու և գրականություն», «Պատմություն», «Աշխարհագրություն», «Կենսաբանություն», «Քիմիա», «Ֆիզիկա», «Մաթեմատիկա» առարկաների գծով։
«Ըստ նոր համակարգի, մանկավարժական կազմում կաշխատեն բացառապես այն ուսուցիչները, ովքեր իրենց մասնագիտական հմտություններով և վարպետությամբ ի վիճակի կլինեն նոր չափանիշներով որակյալ հանրակրթական ծառայություններ մատուցել»,- Աբովյանի անվան հայկական պետական մանկավարժական համալսարանում վկայականների շնորհման արարողության ժամանակ հայտնեց Աշոտյանը։
Նա ընդգծեց, որ կրթության ոլորտի բարեփոխման խնդիրը ոչ միայն առանձին հաստատությունները որպես ավագ դպրոց վերաձևավորելն է, այլ առաջին հերթին մատուցված կրթության որակի բարձրացումը։
«Դասավանդման որակը պետք է բարելավվի, այդ թվում մանկավարժական կադրերի շարունակական վերապատրաստման, նրանց մասնագիտական հմտությունների կատարելագործման և նորարար մանկավարժական նվաճումներին նրանց հաղորդակից դարձնելու ճանապարհով»,- նշեց նախարարը։
Միաժամանակ Աշոտյանը հատուկ ընդգծեց այս գործընթացում ուսուցչի բացառիկ դերը։ «Գաղտնիք չէ, որ դպրոցում ուսուցման որակը որոշվում է մանկավարժով, այն դեպքում, երբ դպրոցի հաջողությունը որոշվում է տնօրենով»,- մասնավորապես նշեց նախարարը։
Նա նաև ընդգծեց նյութատեխնիկական բազայի ապահովման անհրաժեշտությունը։ «Նյութատեխնիկական զինման հարցը շարունակում է արդիական մնալ։ Այս բնագավառում զգալի դրական առաջընթաց է նկատվում և տարեվերջին կամփոփվեն կատարված աշխատանքների արդյունքները»,- հայտնեց Աշոտյանը։
2010թ.-ի մայիսի 13-ին Համաշխարհային բանկի տնօրենների խորհուրդը հաստատել էր Հայաստանին 25 միլիոն ԱՄՆ դոլարի վարկի տրամադրումը «Կրթության որակ և համապատասխանություն» երկրորդ ծրագրի համար: Ծրագիրն ուղղված է բարելավելու միջնակարգ կրթության ուսումնական պլանը, դասավանդման եղանակները, տարրական կրթության մակարդակ ներգրավվող երեխաների պատրաստվածությունն ու Հայաստանի բարձրագույն կրթության համակարգի ինտեգրմանը Եվրոպական բուհական կրթության ոլորտին։
Այսօր Հայաստանում գործում է 91 ավագ դպրոց, սակայն 2011 թվականին դրանց թիվը կավելանա 40-44-ով:
2008թ.-ի մարտի 27-ին ՀՀ կառավարությունը հավանության է արժանացրել ավագ դպրոցների համակարգի ստեղծման ռազմավարական ծրագիրը:
Ծրագիրը նախատեսում է երկրում 150 դպրոց ստեղծել 11 ուղղությամբ, մասնավորապես՝ ֆիզիկամաթեմատիկական, բնագիտական, հումանիտար:-0-
