Գազամատակարարումը Հայաստան կվերականգնվի երեք օրվա ընթացքում. ՀայՌուսգազարդ
Վրաստանի տարածքում գազատարի վերականգնողական աշխատանքների պատճառով երկուշաբթի առավոտյան դադարեցված գազամատակարարումը, նախնական տվյալներով, կվերականգնվի երեք օրվա ընթացքում, «Նովոստի-Արմենիա» գործակալությանը տեղեկացրեց «ՀայՌուսգազարդ» ՓԲԸ-ի մամուլի քարտուղար Շուշան Սարդարյանը:
«Գազամատակարարումը դադարեցվել է այսօր առավոտյան Երևանի ժամանակով ժամը 08:00-ին՝ Ղազախ-Սագուրամո 1000 մմ տրամագծով մայրուղային գազատարի վրա վերանորոգման և վերականգնողական աշխատանքներ իրականացնելու կապակցությամբ: Նախնական տվյալներով՝ աշխատանքները կտևեն 3 օր», - նշեց նա:
«ՀայՌուսգազարդ» ՓԲԸ-ն Հայաստանի ներքին շուկայում ռուսական բնական գազի մատակարարման և տեղաբաշխման մենաշնորհային իրավունք ունի։ Ընկերությունը ստեղծվել է 1997 թ.-ին, նրա բաժնետերերն են «Գազպրոմ» ԲԲԸ-ն և Հայաստանի կառավարությունը:
Անհրաժեշտության դեպքում Հայաստանի սպառողների գազամատակարարումն իրականացվում է Աբովյանի գազապահեստարանի պաշարների հաշվին, որը Հայաստանի գազատրանսպորտային համակարգի (ԳՏՀ) գլխավոր տարրերից մեկն է, որն ապահովում է հանրապետության էներգետիկ անվտանգությունը։ Այն ստեղծվել է 1962 թ.-ին՝ քարաղի նստվածքաշերտում՝ շուրջ 800-1000 մետր խորության վրա և այսօր թույլ է տալիս պահեստավորել մոտ 110 միլիոն խորանարդ մետր գազ։ ԳՏՀ-ի օբյեկտների շարքից դուրս գալու դեպքում այս կայանը, կախված տարվա եղանակից, ի վիճակի է կարևորագույն սպառողներին վառելիքով մատակարարել 1-1,5 ամսվա ընթացքում։ --0—
