Շարժա էմիրության կառավարիչը ցանկանում է համագործակցություն կարգավորելու համար տեղացի բիզնեսմեններին Հայաստան ուղարկել

Նախօրեին Արաբական Միացյալ Էմիրություններում Հայաստանի դեսպան Վահագն Մելիքյանի հետ հանդիպման ժամանակ ԱՄԷ-ի Շարժա էմիրության կառավարիչ Շեյխ Սուլթան բին Մուհամմադ Ալ Կասեմինը նշել է էմիրությունների ձեռնարկատերերի այցի կարևորությունը   Հայաստան՝ երկկողմանի տնտեսական կապերի զարգացման նպատակով, հաղորդում է ԱԳՆ մամուլի ծառայությունը։

«Անդրադառնալով հայ-էմիրաթական առևտրատնտեսական հարաբերությունների խորացմանն ու զարգացմանը` Շեյխ Սուլթանը կարևորել է Շարժա էմիրության առևտրի պալատի ներկայացուցիչներից բաղկացած պատվիրակության այցի կազմակերպումը Հայաստան` տեղում ուսումնասիրելու համագործակցության հնարավորությունները»,- ասվում է հաղորդագրության մեջ։

Զրույցի ընթացքում քննարկվել են առևտրական, տնտեսական և, մասնավորապես, մշակութային համագործակցությանը վերաբերող հարցեր:

Շեյխ Սուլթանը հետաքրքրվել է հարևան երկրների հետ հարաբերություններով, ընդգծել քաղաքակրթությունների երկխոսության շուրջ տարաբնույթ հանդիպումների, փոխադարձ մշակութային միջոցառումների պարբերաբար անցկացումը:

Դեսպան Մելիքյանը հանգամանալից ներկայացրել է Հայաստանի տնտեսական վիճակն ու հնարավորությունները, ինչպես նաև հույս հայտնել , որ հետայսու Շարժա էմիրության գործարար շրջանակներն էլ ավելի ներգրավված կլինեն Հայաստանում զանազան տնտեսական ծրագրերի իրականացման գործում: -0-