ՀՀ ԱԱԽ քարտուղարը Սոչիում երկկողմանի հանդիպումներ է անցկացրել
ՀՀ ազգային անվտանգության խորհրդի քարտուղար Արթուր Բաղդասարյանը՝ ԱԽ բարձրաստիճան ներկայացուցիչների միջազգային հավաքի շրջանակներում, Սոչիում մի շարք երկկողմանի հանդիպումներ է անցկացրել այլ երկրների գործընկերների հետ, «Նովոստի-Արմենիա» գործակալությանը հաղորդեցին ԱԱԽ մամուլի գրասենյակից։
Մասնավորապես Բաղդասարյանը հանդիպել է Ռուսաստանի Անվտանգության խորհրդի քարտուղար Նիկոլայ Պատրուշեւի, Ֆրանսիայի Ազգային անվտանգության եւ պաշտպանության հարցերով գլխավոր քարտուղար Ֆրենսիս Դելոնի, Լյուքսեմբուրգի Ազգային պաշտպանության բարձրագույն կոմիսարիատի բարձրագույն կոմիսար Ռոլան Բոմբարդելլայի, Չինաստանի Հանրային անվտանգության նախարար Մեն Ցզյանչժուի, Ավստրիայի Ազգային անվտանգության խորհրդի եւ արտաքին գործերի նախարարության գործակցությունը համակարգող Գերհարդ Յանդլի հետ:
Քննարկվել են Հայաստանի եւ նշված երկրների անվտանգության խորհուրդների կամ համանման գործառույթներն ունեցող կառույցների միջեւ համագործակցության հաստատման եւ զարգացման հարցեր։
Զրուցակիցները մտքեր են փոխանակել միջազգային անվտանգության սպառնալիքների ու դրանց դիմակայելու ուղղությամբ համատեղ ջանքերի կիրառման հնարավորությունների մասին:
ԱԽ քարտուղար Արթուր Բաղդասարյանն ավարտել է Սոչիի այցը և չորեքշաբթի Երևան կվերադառնա։ Միջազգային հանդիպումը կայացել է հոկտեմբերի 5-6-ը։ -0-
