ՀՀ նախագահը շնորհավորել է ուսուցիչներին և կրթական բարեփոխումների հաջողության վստահություն է հայտնել

Հայաստանի նախագահ Սերժ Սարգսյանը շնորհավորական ուղերձ է հղել Ուսուցչի օրվա առթիվ, հաղորդում է պետության ղեկավարի մամուլի ծառայությունը։

Ուղերձում ասվում է, որ այս օրը կոչված է մեծարելու նրանց, ովքեր իրենց ամենօրյա աշխատանքով նախապատրաստում են Հայաստանի վաղվա օրը:

«Այդ գալիքը կլինի այնքան պայծառ, որքան բարձրակարգ, նվիրված ու ջանասեր կլինեն մեր ուսուցիչներն այսօր: Հայաստանի հանրակրթության համակարգն այսօր ապրում է բարեփոխումների դժվարին ժամանակահատված, որ, վստահ եմ, տալու է իր դրական արդյունքները: Մենք հասնելու ենք կրթական համակարգի էական բարելավման»,- ասաց Սարգսյանը։

Ըստ պետության ղեկավարի՝ այս առումով կրկնակի կարևորվում է ուսուցչի դերը, և բարձրանում նրա պատասխանատվությունը:

Սարգսյանը նշեց, որ ազգային հեռանկարի տեսանկյունից դժվար է գտնել ավելի բարդ, միաժամանակ ավելի պատվաբեր ու շնորհակալ գործ, քան աշակերտ կրթելու և հասարակության արժանապատիվ անդամ ձևավորելու առաքելությունն է:

«Սիրելի՛ ուսուցիչներ, կրկին շնորհավորում եմ Ուսուցչի օրվա առթիվ և մաղթում հաջողություններ: Ձեր յուրաքանչյուր փոքր թվացող հաջողությունը դասասենյակում տասնամյակներ անց անդրադառնալու է որպես Հայաստանի քաղաքացու մեծ հաջողություն իր կյանքում և մասնագիտության մեջ»,- ասվում է նախագահի ուղերձում։

Այս տարվանից Հայաստանում Ուսուցչի օրը պաշտոնապես կտոնվի հոկտեմբերի 5-ին։ Տոնի նախաշեմին կառավարության նախաձեռնությամբ արդեն տասներորդ տարին շարունակ մրցանակներ կշնորհվեն «Տարվա լավագույն ուսուցիչ», «Տարվա լավագույն տնօրեն» և «Տարվա լավագույն դաստիարակ» կոչման համար։

Ամեն տարի հոկտեմբերի 5-ին ավելի քան 100 երկրում նշվում է ուսուցչի օրը, որը 1994թ.-ին հաստատվել է որպես Ուսուցիչների համաշխարհային օր (World Teaches' Day)։ Սա բոլոր ուսուցիչների, դաստիարակների և կրթության ոլորտի աշխատակիցների  պրոֆեսիոնալ տոնն է՝ օր, երբ որակյալ կրթության գործընթացի բոլոր մակարդակներում նշվում է ուսուցիչների դերը, ինչպես նաև հասարակության զարգացման մեջ նրանց անգնահատելի ներդրումը։ -0-