Հայ-ռուսական հարաբերությունները կայունացնող դեր են խաղացել տարածաշրջանում. փորձագետ
Ռուսաստանի նախագահ Դմիտրի Մեդվեդևի՝ Հայաստան կատարած պետական այցի ժամանակ ստորագրած փաստաթղթերը կայունացնող դեր են խաղացել Հարավային Կովկասում, ուրբաթ հայտարարեց ԱՊՀ Ինստիտուտի հայկական մասնաճյուղի տնօրեն Ալեքսանդր Մարկարովը «Ռուսաստան-Հայաստան. հարաբերությունների նոր մակարդակ» թեմայով Երևան-Մոսկվա տեսակամուրջի ընթացքում։
«Հայ-ռուսական համագործակցությունը ռազմավարական բնույթ է կրում, և դա ենթադրում է, որ Ռուսաստանն ավելի մեծ ազդեցություն ունի տարածաշրջանում։ Հայաստանի անվտանգության համակարգը շատ հարցերում կապված է, կարելի է ասել, նույնիսկ պարտական է անվտանգության այն համակարգին, որը մեզ համագործակցություն է երաշխավորում Ռուսաստանի հետ»,- ասաց փորձագետը։
Նա ընդգծեց, որ ռուսական բազայի վերաբերյալ պայմանագիրը պետք է դիտարկել ոչ միայն որպես ժամկետների երկարացման, այլ տարածաշրջանում որպես էական ուժի ներկայության շարունակության պայմանագիր։
«Այդ պայմանագիրը ցույց է տալիս ոչ միայն հայ-ռուսական բարեկամությունը, այլ նաև այն, որ Ռուսաստանը ծրագրում է տարածաշրջանում երկարատև «բնակություն հաստատել»։ Դրանով իսկ Ռուսաստանն ազդանշան է ուղարկում նաև տարածաշրջանի այլ երկրների»,- հավելեց Մարկարովը։ -0
