Հայաստանը պատրաստ է ակտիվ մասնակցություն ունենալ Վերահսկիչ պալատների Եվրոպական Միության աշխատանքներին. ՀՀ նախագահ

Հայաստանը պատրաստ է ակտիվ մասնակցություն ունենալ Վերահսկիչ պալատների Եվրոպական Միության (EUROSAI) աշխատանքներին, այդ թվում` միջոցառումներ անցկացնել Երևանում, հինգշաբթի ԱՊՀ և Բալթյան երկրների բարձրագույն վերահսկիչ մարմինների ղեկավարների խորհրդի հոբելյանական` 10-րդ նստաշրջանին մասնակցելու նպատակով Երևանում գտնվող մասնակիցների հետ հանդիպման ժամանակ ասաց ՀՀ նախագահ Սերժ Սարգսյանը։

«Մենք մեծ կարևորություն ենք տալիս նաև եվրոպական կառույցների հետ համագործակցությանը: Գաղտնիք չէ, որ եվրոպական վերահսկիչ մարմիններում կուտակված է շատ մեծ դրական փորձ, և այն անհրաժեշտ է տեղայնացնել` իհարկե, նկատի առնելով մեր առանձնահատկությունները»,- ասաց Սարգսյանը, հաղորդում է պետության ղեկավարի մամուլի ծառայությունը։

Նման նիստերը, կանոնավոր կապերը և համագործակցությունը որպես չափազանց օգտակար գնահատելով, նախագահը նշեց, որ Հայաստանը մեծ նշանակություն է տալիս Խորհրդի գործունեությանը և պատրաստ է հետագայում նույնպես ակտիվ մասնակցություն ունենալ այս կառույցի աշխատանքներում։

Նախագահ Սարգսյանի խոսքով,  Խորհրդի անդամ երկրները  երկար տարիներ  ապրելով  ընդհանուր պետության մեջ` ունեն  ընդհանուր բնույթի խնդիրներ, որոնք հաճախ ենթադրում են համանման լուծումներ եւ միասնական ջանքեր: Համատեղ աշխատանքն ու փորձի փոխանակումը, Նախագահի հավաստմամբ, մասնակից բոլոր երկրներին միայն օգուտ կարող են բերել:

Բավականին ներկայացուցչական կազմով Նախագահ Սարգսյանին հյուրընկալված Ռուսաստանի, Ուկրաինայի, Բելառուսի, Վրաստանի, Տաջիկստանի, Ղազախստանի, Ղրղըզստանի, Մոլդովայի, Մերձբալթյան երկրների վերահսկիչ մարմինների ղեկավարները, Վերահսկիչ պալատների Եվրոպական Միության նախագահ, Լեհաստանի բարձրագույն վերահսկողական մարմնի նախագահ Յացեկ Յեզերսկիի հետ միասին Հանրապետության ղեկավարի հետ զրուցել են իրենց երկրների վերահսկիչ մարմինների գործառույթների ընդհանրությունների և տարբերությունների, առկա խնդիրների ու համատեղ ջանքերով դրանց լուծման հնարավոր ուղիների մասին:

Կողմերը դիտարկել են համատեղ ջանքերով դրանց լուծման հնարավոր ճանապարհներն ու առկա խնդիրները։ Նրանք բարձր են գնահատել Երևանում հրավիրված նստաշրջանի աշխատանքը, որի արդյունքում ստորագրվել են մի շարք  կարեւոր փաստաթղթեր, նախանշվել` հետագա համագործակցության ծրագրերը: -0

Հայաստանում անցկացվում է ԱՊՀ և Բալթյան մասնակից պետությունների ֆինանսական վերահսկման գերագույն մարմինների ղեկավարների խորհրդի  10-րդ հոբելյանական նիստը։ Նիստի հիմնական թեման ճգնաժամի ժամանկահատվածում սոցիալ-տնտեսական զարգացման հարցերն են, որոնց ընթացքում յուրաքանչյուր երկիր կներկայացնի պետության զարգացման համար անցկացվող միջոցառումների ազդեցության մասին իր մոտեցումները։ -0-