ԵՐԵՎԱՆ, 29 սեպտեմբերի. /Նովոստի-Արմենիա/. Ծիծեռնակաբերդի Հայոց ցեղասպանության զոհերի հուշահամալիր այցելությունը պատվի և խղճի պարտք է, չորեքշաբթի Երևանի հուշահամալիր այցելության ժամանակ լրագրողներին ասաց ՌԴ Հաշվիչ պալատի նախագահ Սերգեյ Ստեպաշինը։
ԱՊՀ և Բալթյան երկրների բարձրագույն վերահսկող մարմինների ղեկավարների պատվիրակությունը, որը Հայաստանում է գտնվում Բարձրագույն մարմինների խորհրդի 10-րդ հոբելյանական նիստին մասնակցելու նպատակով, չորեքշաբթի այցելեց Ծիծեռնակաբերդ։ Պատվիրակության անդամները հարգանքի տուրք են մատուցել 1915թ.-ին Օսմանյան կայսրությունում Հայոց ցեղասպանության զոհերի հիշատակին, ծաղկեպսակ և ծաղիկներ են դրել «հավերժական կրակի» մոտ։
«Ես առաջին անգամ չէ, որ այստեղ եմ տգնվում, և սա անմեղ զոհված մարդկանց հիշատակն է»,- ասաց Ստեպաշինը։ Նա նշեց, որ Հայաստանի համար սա ազգային ողբերգություն է, սա «զարմանալիորեն գեղեցիկ ժողովրդի նյարդը, հոգին և սիրտն է»։
Այդ կապակցությամբ ՌԴ Հաշվիչ պալատի ղեկավարը վստահություն հայտնեց, որ ցանկացած մարդու, առավել ևս ռուսների համար, քանի որ Ռուսաստանը Հայաստանի համար մտերիմ երկիր է, «պարզապես պատվի, խղճի և հոգու պարտքն է այցելել այս վայրը»։ «Շնորհակալ եմ, որ դուք չեք մոռանում ձեր հիշատակը»,- ավելացրեց Ստեպաշինը։
ԱՊՀ և Բալթյան երկրների Վերահսկիչ ծառայութունների անդամները միասին եղևնի տնկեցին հիշատակի ծառուղում, որի կողքին ցուցանակ տեղադրվեց՝ «Ի հիշատակ Հայոց ցեղասպանության զոհերի՝ ԱՊՀ մասնակից երկրների պետությունների ֆինանսական վերահսկողության բարձրագույն մարմինների ղեկավարների խորհրդի կողմից» մակագրությամբ ։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։ Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
