Հայաստանում այսօրվա դրությամբ 45 822 միավոր զենք է գրանցված, ասաց ՀՀ ոստիկանության հասարակական կարգի ապահովման վարչության պետի տեղակալ, գնդապետ Կարեն Մեհրաբյանը։
«Գրանցված զենքերից 3 683 միավորը ակոսավոր փողով որսորդական զենք է, 33 648-ը՝ որսորդական հարթ փողով զենք է, 2011-ը՝ պարգևատրված, 6233-ը՝ գազով զենք է և 72 հավաքածու՝ 274 միավոր զենքով»,- հինգշաբթի մամուլի ասուլիսի ժամանակ ասաց նա։
Մեհրաբյանը հայտնեց, որ միայն այս տարի Հայաստանում 2812 անձինք քաղաքացիական զենք կրելու թույլտվություն են ստացել, ինչը փոքր-ինչ ավելի է անցյալ տարվա ցուցանիշից։
Ըստ նրա՝ վերջին տարիներին պաշտպանության նպատակով զենք ձեռք բերելու դեպքերը կրճատվել են, միաժամանակ ինքնապաշտպանության հիմնական զենքը գազային ատրճանակն է, որը հաճախ կանայք են օգտագործում։
Մեհրաբյանը նշեց, որ զենքի անօրինական պահելու խնդիր կա, բայց դժվարացել է անօրինական շրջանառության չափերը նշել։
Ըստ նրա տվյալների՝ 2010թ..-ի ութ ամիսների ընթացքում 10 279 հանցագործություն է կատարվել, որոնցից 39-ը՝ հրազենի օգտագործմամբ, ընդ որում այդ զենքի միայն 10 տոկոսն է հաշվառման ենթարկվել։
Այդ կապակցությամբ նա նշեց, որ տվյալ ոլորտում անհրաժեշտ է իրավական դաշտը կարգավորել։ «Անօրինական պահվող զենքի հանձնումը շարունակվում է։ 2010թ.-ին 72 միավոր է առգրավվել, իսկ ինքնակամ 11 միավոր է հանձնվել, ընդ որում՝ առգրավվել են առավելապես որսորդական զենքերը, որոնց գրանցման ժամկետը ժամանակին չի երկարացվել»,- ասաց գնդապետը։
Մեհրաբյանը տեղեկացրեց, որ Հայաստան առավելապես զենք է բերվում Ռուսաստանից, ինչպես նաև Եվրոպայից, և իրացվում է համապատասխան արտոնագիր ունեցող հատուկ խանութներում։
Զենքի մասին օրենքի համաձայն՝ արտոնագիրը տրվում է մինչև հինգ տարի ժամկետով և միաժամանակ թույլտվություն է համարվում զենք պահելու և կրելու համար, եթե դրանում զենքի գրանցման մասին համապատասխան նշում է արվել։
Միաժամանակ լրագրողների հարցին պատասխանելով՝ ՀՀ ոստիկանության հասարակական կարգի ապահովման վարչության պետի տեղակալն ասաց, որ մասնավոր թիկնապահներն իրավունք ունեն միայն գազային ատրճանակից օգտվելու։ «Եթե օլիգարխների կամ պատգամավորների պահակախումբը մարտական զենք ունի, նշանակում է, որ նրանք պետական պահպանության մարմինների ծառայության աշխատակիցներ են»,- ասաց նա։
Ըստ Մեհրաբյանի՝ զենքի մասին օրենքը բարեփոխման կարիք ունի, և այժմ լրացումների փաթեթ է պատրաստվում, որը կներկայացվի 2011թ.-ի երկրորդ կեսին։ -0-
