Լեգենդար խորհրդային հետախույզ Գևորգ Վարդանյանը Երևանի Անանիա Շիրակացու անվան ճեմարանի սաների հետ հանդիպման ժամանակ ասաց, որ հավատում է Հայաստանի մեծ ապագային։
«Ես շատ ուրախ եմ, որ Հայաստանի նախագահ Սերժ Սարգսյանի հրավերով կրկին Հայրենիքում եմ՝ կնոջս՝ Գոհարի հետ։ Մենք կմասնակցենք Հայաստանի անկախության օրվան նվիրված միջոցառումներին»,- շաբաթ օրը ճեմարան այցելության ժամանակ ասաց Վարդանյանը։
Լեգենդար հետախույզը դպրոցականներին կոչ է արել իրենց Հայրենիքի արժանի զավակը լինել։
«Այն ամենը, ինչ ես արել եմ իմ ողջ կյանքի ընթացքում, ես արել եմ միակ նպատակով՝ պիտանի լինելու իմ հայրենիքին։ Մենք Հայաստան ենք ժամանում տարին մեկ-երկու անգամ, և երբ մենք ոտք ենք դնում այդ սուրբ հողի վրա, մեզ լիարժեք տանն ենք զգում»,- ասաց Վարդանյանը։
Նա նշեց, որ երբ պատերազմից հետո՝ 1946-47թթ.-ին սկսվեց հայրենադարձության գործընթացը, իրենք շատ էին ցանկանում թողնել Իրանն ու Հայաստան գալ, սակայն չստացվեց։
«Մենք եկանք միայն 1951թ.-ին, ընդունվեցինք Օտար լեզուների ինստիտուտ (այժմ՝ Երևանի Բրյուսովի անվան պետական լեզվաբանական համալսարան)։ Մենք ընտրություն ունեինք՝ կամ Մոսկվայում, կամ Երևանում բնակվել. իհարկե, մենք Երևանն ընտրեցինք»,- ասաց հետախույզը՝ ավելացնելով, որ այժմ Մոսկվայում բնակվելով՝ իրենք փորձում են որքան հնարավոր է հաճախ հայրենիք ժամանել։
Ըստ Վարդանյանի՝ շատ կարևոր է երեխաների մեջ հայրենասիրություն, մայրենի լեզվի, մշակույթի հանդեպ սեր սերմանելը։
«Առանց հայրենասիրության ոչ մի գործ ձեզ մոտ չի ստացվի։ Հայրենիքի հանդեպ սերը պետք է կարմիր թելով անցնի բոլոր գործերում»,- ավելացրեց նա։
Գևորգ Վարդանյանը լեգենդար խորհրդային հետախույզ է։ Իրանում աշխատելու տարիներին Վարդանյանին ու նրա խմբին հաջողվեց մերկացնել ավելի քան 400 գերմանական գործակալների։Վարդանյանը մասնակցել է 1943թ.-ին Թեհրանի վեհաժողովի անվտանգության ապահովման գործողություններին։
Նա իր յոթ հոգուց բաղկացած խմբի հետ միասին կարողացավ կանխել ֆաշիստական Գերմանիայի հետախույզների կողմից ծրագրված Ստալինի, Ռուզվելտի և Չերչիլի դեմ մահափորձը։ Հետախույզի կինը ամեն կերպ օգնել է նրան և հաճախ ինքն է մասնակցել գաղտնի գործերին։ -0-
