Հայաստանում խստացվել է նորածինների հաշվառման վերահսկողությունը

ՀՀ խորհրդարանը հինգշաբթի երկրորդ և վերջնական ընթերցմամբ ընդունել է Քրեական օրենսգրքում, «Վարչական իրավախախտումների մասին», «Լիցենզավորման մասին» օրենքներում նախատեսված փոփոխություններն և լրացումները, ըստ որոնց՝ խստացվում է նորածինների հաշվառման հետ կապված հարցի վերահսկումը:

Ինչպես նշեց ՀՀ ԱԺ փոխխոսնակ Արևիկ Պետրոսյանը, փոփոխություններով նախատեսվում է ծնված երեխաներին չհաշվառելու դեպքերի բացահայտման հետ կապված հարցերի կարգավորումը:

Օրենքով նախատեսված է, որ երեխայի հաշվառումն իրականացվում է ՔԿԱԳ  բաժիններում, որոնց թիվը երկրում շուրջ 50-ն է և որոնք հաճախ մի քանի համայնք են սպասարկում:

«Արդյունքում շատ ծնողներ, ովքեր պետք է անձամբ ներկայանան և հաշվառեն երեխային, չեն կարողանում հասնել բաժին, ինչը հանգեցնում է երկրում ծնելիության բացարձակ ցուցանիշների բացակայության, նման կերպով երեխաները զրկվում են սոցիալական բոլոր նպաստներից և կարող են թրաֆիքինգի զոհ դառնալ», - ասաց Պետրոսյանը:

Նրա խոսքերով՝ փոփոխություններով նախատեսվում է, որ երեխաների ծնունդի չգրանցված դեպքերի բացահայտման պարտավորություններն ու լիազորությունները ստանձնում են համայնքների ղեկավարները՝ ընդհուպ մինչև երեխայի ծնունդը գրանցելու նպատակով Քաղաքացիական կացության ակտերի գրանցման բաժին ինքնուրույն հայտ ներկայացնելու թույլտվություն:

Օրենքով այսուհետ նախատեսված է նաև պետության հաշվին հաշվառման բոլոր ծախսերի իրականացման հնարավորությունը, այդ թվում նաև տեղում՝ համայնքներում, երեխաների ծնունդը գրանցելու հնարավորությունը:

Ուսումնասիրությունների համաձայն, ողջ աշխարհում հաշվառման է ենթարկվում նորածինների միայն 60 տոկոսը: ՄԱԿ-ի Մանկական հիմնադրամի վերջին ուսումնասիրությունների համաձայն, որոնց ավելի քան 1400 ընտանիք է մասնակցել, Հայաստանի Շիրակի, Գեղարքունիքի մարզերում և Երևանում բացահայտվել է երեխայի ծնունդի չգրանցման 145 դեպք: Ծնելիության չհաշվառման հիմնական պատճառներն են ընտանիքների սոցիալապես անապահով լինելը, վարչական խնդիրները, բյուրոկրատիան:

Տարվա առաջին վեց ամսվա ընթացքում Հայաստանում լույս աշխարհ է եկել ավելի քան 21 հազար նորածին, ինչը 7.1 տոկոսով պակաս է 2009 թ.-ի նույն ժամանակահատվածի ցուցանիշից: Հազար բնակչի հաշվով ծնելիության ընդհանուր ցուցանիշն աճել է 0,8 պրոմիլով և կազմել 13 ppm:

Պաշտոնական վիճակագրական տվյալների համաձայն, եթե 90-ականների սկզբին Հայաստանում տարեկան ծնվել է շուրջ 70-80 հազար երեխա, ապա 2001 թ.-ին այդ թիվը կազմել է 32 հազար: Այսօրվա դրությամբ Հայաստանում վերարտադրական տարիքի ամեն կնոջ միջինում բաժին է հասնում 1,4 երեխա:-0-