ԵՐԵՎԱՆ, 11 սեպտեմբերի. /Նովոստի-Արմենիա/. ՄԱԿ-ից Ղարաբաղի վերաբերյալ բանաձևի հետ կանչման մասին Ադրբեջանի որոշումը պայմանավորված է ոչ այնքան ՀՀ արտգործնախարարության ջանքերով, որքան գերտերությունների, մասնավորապես, ԵԱՀԿ ՄԽ համանախագահ-երկրների դիրքորոշումով, կարծում է Կովկասի ինստիտուտի տնօրեն Ալեքսանդր Իսկանդարյանը:
Ադրբեջանը նախօրեին որոշել է հանել սեպտեմբերի 9-ին նախատեսված ՄԱԿ-ի Գլխավոր վեհաժողովի քննարկումից և քվեարկությունից նրա կողմից ներկայացված բանաձևի A/64/L.57 նախագիծը և տեղափոխել այս կետը ՄԱԿ-ի ԳՎ-ի 65-րդ նստաշրջանի օրակարգ:
«ՄԽ համանախագահ-երկրների դիրքորոշումը հասկանալի է: Գոյություն ունի բանակցային գործընթաց, որն ընթանում է Մինսկի խմբի շրջանակներում, և եթե նույնիսկ մոտ ժամանակներս հակամարտության կարգավորման հեռանկար չի նկատվում, բանակցային գործընթացը պետք է շարունակվի», - շաբաթ օրը «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասաց քաղաքագետը:
Իսկանդարյանի խոսքերով՝ գերտերությունները կարծում են, որ անհնար է ՄԱԿ-ի շրջանակներում լուծել ղարաբաղյան հակամարտության նման խնդիրը:
«Միացյալ ազգերի կազմակերպության հարթակ այս հարցի դուրսբերումը ավելի շատ կապ ունի նոյեմբերին Ադրբեջանում կայանալիք խորհրդարանական ընտրությունների, քան հակամարտության կարգավորման իրական փորձի հետ», - ընդգծեց փորձագետը:
Նա կարծում է, որ եթե կա խնդիրը լուծելու ցանկություն, ապա այն հարկավոր է քննարկել գոյություն ունեցող ՄԽ-ի ձևաչափի շրջանակներում, ինչպիսին էլ այն լինի, իսկ եթե քարոզչական նպատակներ են հետապնդվում, ապա այդ ժամանակ հարկավոր է հարցը բերել ՄԱԿ-ի հարթակ:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
