Հայաստանի մշակութային կյանքն ապակենտրոնացման կարիք ունի. վարչապետ

ՀՀ վարչապետ Տիգրան Սարգսյանը անհրաժեշտ է համարում Երևանից հանրապետության մարզեր  մշակութային իրադարձությունների տեղափոխումը, երեքշաբթի հաղորդում է կառավարության մամուլի ծառայությունը։

Երեքշաբթի վարչապետը մասնակցել է Արթիկի Մշակույթի տան նոր շենքի բացմանը, որտեղ կենտրոնի հարակից տարածքում եղևնի է տնկել, հանդիպել է Արթիկի բնակիչների հետ, ծանոթացել նոր կենտրոնին։

Կառավարության նախագահը նշել է, որ մշակույթի տանը գործող սրահները, դասասենյակները հնարավորություն կտան միջոցառումներն անցկացնել բարձր մակարդակով։

 «Դա խթան կհանդիսանա, որ Արթիկում բարձրանա նոր մշակութային ալիք։ Սա բխում է նաև համայնքների համաչափ զարգացման ծրագրից։ Մշակույթը Երևանից պետք է տեղափոխվի նաև մարզեր»,- ասաց վարչապետը։

Արթիկի մշակույթի տան կառուցման աշխատանքներն իրականացվել են անվանի նկարիչ և քանդակագործ Վարազ Սամուելյանի կտակի համաձայն։ Վարազ Սամուելյանը ծնվել է Երևանում` Հայոց ցեղասպանությունը վերապրածների ընտանիքում և տեղափոխվել է ԱՄՆ Հայրենական Մեծ պատերազմից հետո (1946թ.), որտեղ և կայացել է որպես նկարիչ ու քանդակագործ։ Ֆրեզնոյում գտնվող նրա հեղինակած Սասունցի Դավթի բրոնզաձույլ արձանը ԱՄՆ-ում հայ ինքնության ամենախոսուն խորհրդանիշերից է։

«Հայաստան» համահայկական հիմնադրամի կողմից կառուցված 550քմ. ընդհանուր մակերեսով մշակույթի տան առաջին հարկում գտնվում են հանդիսությունների սրահը, երկրորդ հարկում` կերպարվեստի և երաժշտական խմբակների դասարանները։ -0-