Հայտնի հայ նկարիչ Մինաս Ավետիսյանի երկու որմնանկարների վերականգնումը կավարտվի նոյեմբերի 3-ին, ասաց ՀՀ կրթության և գիտության նախարարության ժամանակակից արվեստի վարչության պետ Սոնա Հարությունյանը:
«Այս տարի կառավարությունը 20 մլն դրամ (շուրջ 53,3 հազար դոլար) է հատկացրել վարպետի «Խաչքարի մոտ» և «Հանդիպում» երկու որմնանկարների՝ կառավարության գլխավոր շենք տեղափոխմանն ու վերականգնմանը»,- «Նովոստի» միջազգային մամուլի կենտրոնում ասաց Հարությունյանը:
Ըստ նրա, 2009թ.-ին Մինասի «Թորոս Ռոսլինի ծնունդը» որմնանկարն արդեն վերականգնվել և տեղադրվել է հայրենի Ջաջուռ գյուղի թանգարանում:
Հարությունյանը նաև հայտնեց, որ այսօր երեկոյան Երևան կժամանի իտալացի մասնագետ Ֆաբրիցիո Յակոբինին՝ Հայկական մշակույթի հետազոտության կենտրոնի ռեստավրատորներից մեկը, ով կզբաղվի երկու որմնանկարների վերականգնմամբ:
Նա ավելացրեց, որ Ֆաբրիցիոն նաև մասնակցել է առաջին որմնանկարի վերականգնմանը:
Ըստ Հարությունյանի, ընդհանուր առմամբ, որմնանկարների վերականգնումը երեք փուլից է բաղկացած: Որմնանկարների վերականգնման առաջին փուլը տեղի կունենա սեպտեմբերի 2-10-ը, եկրորդը՝ սեպտեմբերի 27-ից մինչև հոկտեմբերի 6-ը, իսկ երրորդը՝ հոկտեմբերի 25-ից մինչև նոյեմբերի 3-ը:
«Որմնանկարների վերականգնման երրորդ փուլը կներառի որմնանկարների վերջնական մշակումը և դրանց փոխադրումը կառավարության տուն»,- ասաց նա:
Հարությունյանն ընդգծեց, որ կառավարությունում որմնանկարների տեղադրման պրակտիկա կա շատ եվրոպական երկրներում, և ըստ նրա, Մինաս Ավետիսյանի արվեստի սիրահարների համար շաբաթը մեկ անգամ «բաց դռների օրեր» հայտարարելու մասին պայմանավորվածություն կա կառավարության հետ:
Հայտնի նկարչի որդին, Ջաջուռում Մինասի թանգարանի տնօրեն, «Մինաս Ավետիսյան» հիմնադրամի նախագահ Արման Ավետիսյանն իր հերթին նշեց, որ ներկայում վերականգնման կարիք ունի ևս վեց որմնանկար: Ըստ Ավետիսյանի, ամեն որմնանկարի վերականգնման համար շուրջ 15 մլն դրամ (ավելի քան 41 հազար դոլար) է պահանջվում: -0-
