Հայաստանի դպրոցները սեպտեմբերի 1-ին իրենց դռները կբացեն ավելի քան 37 հազար առաջին դասարանցիների համար, երկուշաբթի դպրոցների տնօրենների հետ խորհրդակցության ժամանակ լրագրողներին հայտնեց ՀՀ կրթության և գիտության նախարար Արմեն Աշոտյանը։
Ըստ նրա, օգոստոսի ավանդական խորհրդակցությունների ժամանակ, որոնցից վերջինը տեղի է ունեցել երկուշաբթի օրը Երևանում, դպրոցների տնօրենների կողմից մի շարք հարցեր են բարձրացվել, որոնք վերաբերում են ուսումնական ծրագրերի, դասագրքերի, տեխնիկական սարքավորումների խնդիրներին։
«Այս ուսումնական տարին տարբերվում է աննախադեպ բարեփոխումներով և նորարարություններով։ Կրթությունն այն ոլորտն է, որը ենթակա է մշտապես բարեփոխումների է»,- ասաց նախարարը։
«Այսօր մենք մեր առջև ենք դնում վարչարարության որակի բարելավման խնդիրը։ Դրա տակ մենք առաջին հերթին հասկանում ենք դպրոցների տնօրենների վարչարարական ունակությունների մակարդակի բարձրացումը»,- նշեց Աշոտյանը։
Ինչ վերաբերում է դասագրքերին, ապա, ըստ նախարարի, պետությունը հոգ է տարել, որպեսզի բոլոր դպրոցներն ապահոված լինեն դասագրքերով։
«Տնօրեններն ու ուսուցիչները ինչպես կոնցեպտուալ, այնպես էլ ֆինանսական բնույթի հարցեր են առաջ քաշել։ Պետք է նշել, որ մենք ի վիճակի ենք հիմնական խնդիրները լուծել առանց լրացուցիչ ֆինանսական միջոցներ ներգրավելու։ Իհարկե, ֆինանսական խնդիրները միշտ առկա են կրթության ոլորտում, սակայն, կարծում եմ, որ մեր ներքին ներուժի հաշվին հնարավոր է նախատեսված բարեփոխումներն իրականացնել»,- ասաց նա։
Նախարարն ընդգծեց, որ Հայաստանում կրթական բարեփոխումները ճիշտ ճանապարհի վրա են։
«Մենք այդ բնագավառում համաշխարհային միտումներին համընթաց ենք առաջ գնում»,- ասաց նա։
Աշոտյանը նաև հիշեցրեց, որ 2010թ.-ի սեպտեմբերի 1-ին՝ Գիտելիքների օրը, առաջին անգամ տեղի կունենա հայ ուսուցիչների երդման հանդիսավոր արարողությունը։
«Երդման տեքստերը կճշտվեն, սրբագրումներ կկատարվեն։ Երդում տալով՝ մեր ուսուցիչները ևս մեկն անգամ կհաստատեն, որ կրթությունն աշխատանք չէ, այլ առաքելություն»,- նշեց նախարարը՝ ավելացնելով, որ մյուս տարվանից սկսած՝ երդում կտան այն ուսուցիչները, ովքեր նոր են սկսում իրենց գործունեությունը։ -0-
