Հայկական դիվանագիտությունը պետք է բարեկամ երկրներին կոչ անի ճանաչել Ղարաբաղի անկախությունը. պատգամավոր

Հայկական դիվանագիտությունը պետք է բարեկամ երկրներին կոչ անի ճանաչել Լեռնային Ղարաբաղը՝ որպես միջազգային իրավունքի սուբյեկտ, կարծում է իշխող Հայաստանի Հանրապետական կուսակցության խորհրդարանական խմբակցության ղեկավար Գալուստ Սահակյանը։

«ՄԱԿ-ի Միջազգային դատարանի որոշումից (Կոսովոյի վերաբերյալ) հետո, կարծում եմ, որ մեր դիվանագիտությունը՝ մնալով ԵԱՀԿ Մինսկի խմբի շրջանակներում, որը միակ ձևաչափն է, որտեղ մենք կարող ենք մեզ համար շահավետ դիրքորոշումներ ապահովել, պետք է բարեկամ երկրներին կոչ անի Լեռնային Ղարաբաղը ճանաչել միջազգային իրավունքի սուբյեկտ»,- չորեքշաբթի մամուլի ասուլիսի ժամանակ ասաց Սահակյանը։

Հուլիսի 22-ին ՄԱԿ-ի Միջազգային դատարանի նախագահ Խիսասի Օվադան (Ճապոնիա) հայտարարել է, որ Կոսովոյի անկախության ինքնահռչակումը չի հակասում միջազգային իրավունքի նորմերին: Ինչպես ընդգծել է Օվադան, դատարանը կարծում է, որ միջազգային իրավունքն անկախության հռչակման որևէ տեսանելի արգելք չի պարունակում:

Ըստ պատգամավորի, Հայաստանի բարեկամ երկրները պետք է նաև աջակցեն հանրապետության՝ ղարաբաղյան հակամարտության խաղաղ կարգավորման ջանքերին։ Եթե Ղարաբաղը միջազգային իրավունքի սուբյեկտ ճանաչվի, ինչպես կարծում է Սահակյանը, ենթադրվում է, որ արտասահմանում տարբեր ներկայացուցչական մարմիններ կբացվեն, ինչն այդ երկրներում կբարձրացնի իրազեկության մակարդակը։

Ինչպես ավելացրեց խորհրդարանականը, այդ գործընթացը կառուցողական ազդեցություն կունենա հակամարտության կարգավորման գործընթացի վրա։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-