Հայաստանում ռուսական ռազմաբազայի գործառույթներն անփոփոխ կմնան. Լավրով

ԵՐԵՎԱՆ, 19 օգոստոսի. /Նովոստի-Արմենիա/. Հայաստանում ռուսական ռազմաբազայի գործառույթները կմնան անփոփոխ Հայաստանի տարածքում բազայի տեղակայման մասին համաձայնագրի արձանագրության ստորագրումից հետո ևս, տեղեկացրել է ՌԴ ԱԳ նախարար Սերգեյ Լավրովը:

Հայաստանում ռուսական ռազմաբազայի մասին 1995 թ.-ին ստորագրված պայմանագրի գործողությունների ժամկետների երկարացման մասին արձանագրության ստորագրումը նախատեսված է ՌԴ նախագահ Դմիտրի Մեդվեդևի՝ օգոստոսի 19-ին մեկնարկող Հայաստան պետական այցի շրջանակներում:

«Այս հարցը հենց հիմա արդիականացնելը պայմանավորված չէ որևէ յուրահատուկ պատճառով կամ հանգամանքով», - ասել է Լավրովը Հայաստանի հանրային հեռուստաընկերությանը տված հարցազրույցում: Նրա խոսքերով՝ ցանկացած պետություններ, որ սերտորեն համագործակցում են ռազմական ոլորտում, օրինակ՝ Ռուսաստանն ու Հայաստանը, իրենց գործողությունների ծրագրման կարիքն ունեն, և արձանագրության հիմնական նպատակն ավելի երկարաժամկետ ծրագրավորումն է:

Լավրովը նշել է, որ այլ իմաստով ռուսական ռազմաբազայի կողմից իրականացվող բոլոր գործառույթները մնում են անփոփոխ, և Հայաստանի տարածքում ռուսական ռազմաբազայի իրականացրած գործողություններում որևէ փոփոխություն ակնկալել պետք չէ:

Ռուսական ռազմաբազան տեղակայվել է 1995թ.-ից Գյումրի քաղաքի մոտակայքում՝ Կարմիր դրոշի շքանշանակիր Անդրկովկասյան ռազմական օկրուգի միավորումների հիման վրա միջպետական պայմանագրերի համաձայն: Բազան ՌԴ Հյուսիսկովկասյան ռազմական օկրուգի Անդրկովկասյան ռուսական զորքախմբի ենթակայության տակ է գտնվում:-0-