Ադրբեջանը հրաժարվել է օդային տարածք տրամադրել gերմանական ինքնաթիռի համար, որը Աֆղանստանից Երևան էր տեղափոխում հայ խաղաղարարներին, հաղորդում է «Ազատություն» ռադիոկայանը` հղում անելով ՀՀ պաշտպանության նախարարությունում ունեցած իր աղբյուրներին:
«Աֆղանստանում անվտանգության աջակցության միջազգային ուժերի (ISAF) համար փոխադրումներ իրականացնող ուղևորատար ինքնաթիռը, որը Երևան էր տեղափոխում Կունդուզում գերմանական հրամանատարության կազմում իրենց առաքելությունն ավարտած հայ խաղաղարարներին, ստիպված էր այլ երթուղի փնտրել: Հայ խաղաղարարները դեռ չեն ժամանել Երևան», - հաղորդում է ռադիոկայանը:
Տեղեկատվության համաձայն, Հայաստանի պաշտպանության նախարարությունում այս միջադեպը համարել են Աֆղանստանում ՆԱՏՕ-ի ուժերի մատակարարման գործընթացին խոչընդոտում, ինչպես նաև Աֆղանստան մատակարարումներ իրականացնելու համար Հայաստանի օդային տարածքի և օդանավակայանների օգտագործման սահմանափակման փորձ:
«Պաշտպանության նախարարությունում քննարկվում է համարժեք միջոցառումների հնարավորությունը, մասնավորապես` Հայաստանի օդային տարածքի օգտագործման արգելքը ռազմական նշանակության բեռների փոխադրում իրականացնող և Բաքվում վայրէջք կատարող ինքնաթիռների համար, չնայած ավելի վաղ Հայաստանը երբեք չի փակել իր օդային տարածքը Թուրքիայից դեպի Ադրբեջան չվերթեր իրականացնող ինքնաթիռների, ինչպես նաև Աֆղանստանից և հակառակ ուղղությամբ չվերթեր իրականացնող ինքնաթիռների համար», - նշվում է ռադիոկայանի տեղեկատվության մեջ:
Հայկական խաղաղապահ համակազմն իր գործունեությունն է իրականացնում գերմանական ղեկավարության ներքո Կունդուզ քաղաքում ISAF Հյուսիսային տարածաշրջանային հրամանատարության գործող խմբի կազմում 2010 թ.-ի փետրվարից: Հայկական զինվորական համակազմում են հետևակային դասակը, սպա-բժիշկն ու շտաբային երեք սպաներ։ -0-
