Ռուսաստանը շնորհակալ է Հայաստանին հրդեհներից տուժածներին օգնելու համար
Հայաստանում ՌԴ դեսպանության խորհրդական, Ռոսսոտրուդնիչեստվոյի ներկայացուցչության ղեկավար Վիկտոր Կրիվոպուսկովը շնորհակալություն է հայտնել Հայաստանին Ռուսաստանում հրդեհների հետևանքով տուժածներին օգնություն ցուցաբերելու համար։
«Ես շնորհակալության խոսքեր եմ հայտնում Հայաստանի կառավարությանը, որը հատուկ միջոցներ է հատկացրել Ռուսաստանի տարածքում հրդեհների մարման նպատակով»,- հինգշաբթի լրագրողներին ասաց Կրիվոպուսկովը։
Հայաստանի և Ռուսաստանի նախագահներ Սերժ Սարգսյանի և Դմիտրի Մեդվեդևի միջև եղած պայմանավորվածությունների շրջանակներում, Հայաստանը ՌԴ է ուղղել հատուկ տեխնիկա և հրշեջ փրկարարների խումբ։ Իլ-76 երկու ռազմատրանսպորտային ինքնաթիռը Ռուսաստան է հասցրել 28 հրշեջ-փրկարարների, ինչպես նաև 10 տոննա տարողությամբ 4 հրշեջ մեքենա։
Կրիվոպուսկովը շնորհակալություն հայտնեց նաև բոլոր նրանց, ովքեր աջակցություն են ցուցաբերում բոլոր տուժածներին՝ մարդասիրական օգնություն հավաքելով։ «Միջոցների հանգանակությունն իրականացվում է Երևանում՝ Արամ Խաչատրյանի հուշարձանի մոտ»,- նշեց Կրիվոպուսկովը։
Ռոսսոտրուդնիչեստվոյի ներկայացուցչության ղեկավարն ընդգծեց, որ միջոցների հանգանակության ակցիային ակտիվ մասնակցում են նաև Հայաստանի ռուս հայրենակիցները, ինչպես նաև ՌԴ դեսպանության աշխատակիցները։
Երևանում նախօրեին Ռոսսոտրուդնիչեստվոյի հայաստանյան ներկայացուցչությանը մարդասիրական օգնություն է (400 արկղ) փոխանցվել՝ նախատեսված անտառային հրդեհների հետևանքով տուժած ՌԴ բնակիչների համար:
Համահայկական միջազգային երիտասարդական կենտրոնի կողմից անցկացված ակցիայի արդյունքում հավաքագրված բոլոր միջոցները կուղղվեն Նիժեգորոդսկի և Վորոնեժի մարզեր: Կենտրոնի կոչերին արձագանքել է ավելի քան 1000 երիտասարդ: Հագուստից, կոշկեղենից, տաք հագուստից, անկողինից և առաջին անհրաժեշտության այլ իրերից բացի, կենտրոնի անդամները հավաքել են նաև ֆինանսական միջոցներ, որոնք կփոխանցվեն հրդեհներից տուժածների համար միջոցների հավաքագրման պաշտոնական հաշվեհամարներին
Երևանում միջոցների հանգանակություն է կազմակերպում նաև «Միասին» երիտասարդական շարժումը։ -0-
