Հայաստանում նշվել է երկաթուղայինի օրը
Երկաթուղայինի օրվան նվիրված տոնական միջոցառում է անցկացվել կիրակի Երևանի Մանկական երկաթուղու հարակից այգում, որին մասնակցել են ՀՀ տրանսպորտի և կապի նախարար Մանուկ Վարդանյանը, ՀՀ ԱԺ պատգամավորներ, «Հարավկովկասյան երկաթուղի» ՓԲԸ ղեկավարությունը, ոլորտի աշխատակիցներ:
Միջոցառման ընթացքում ՀԿԵ-ի գլխավոր տնօրենի տեղակալ Մարատ Խակովը վստահեցրել է, որ երկաթուղում աշխատող բոլոր մարդկանց կատարած աշխատանքի նկատմամբ հարգանքը տարեցտարի միայն կաճի:
«Այս երկաթուղային տարվա ընթացքում ՀԿԵ-ում շատ բան է արվել, արդիականացվել են կայարանները, ամրապնդվում են գծային տնտեսությունները, ենթակառուցվածքները: Վերջերս մենք ձեզ հետ միասին ներկա էինք լոկոմոտիվային դեպոյի վերակառուցման առաջին փուլի բացմանը», - ասել է Խակովը:
Նրա խոսքերով՝ կապիտալ վերանորոգվել են ուղևորային շարժակազմն ու լոկոմոտիվները: Խակովը նշել է, որ այս ամենին հաջողվեց հասնել անհրաժեշտ ներդրումների շնորհիվ:
Նա նաև տեղեկացրել է, որ ավելի քան 100 տոկոսով կատարվել են բարձումների և տեղափոխումների ծրագրերը, իսկ տեղամասային արագությունը թույլ է տալիս ապահովել ողջ բարձման ապահովման համար անհրաժեշտ լոկոմոտիվների և վագոնների աշխատանքը:
Ընկերության գլխավոր տնօրենի տեղակալի խոսքերով՝ ՀԿԵ-ի նպատակն է ինտեգրվել եվրասիական տրանսպորտային-բեռնափոխադրման համակարգի մեջ, և հենց այս ամենի հիման վրա է կառուցվել ներդրումային ծրագիրը:
«Բոլոր երկաթուղայինների և անձամբ իմ անունից կցանկանայի շնորհակալություն հայտնել երկրի ղեկավարությանն՝ ի դեմս նախագահի, մարզերի ղեկավարությանը աջակցության և ըմբռնման համար», - ասել է Խակովը՝ համոզմունք հայտնելով, որ հետագայում ևս հանրապետության ղեկավարության կողմից ներկայացված խնդիրները կլուծվեն համատեղ ջանքերով:
Միջոցառման ընթացքում մի խումբ երկաթուղայինների հանձնվեցին շնորհակալագրեր և նվերներ ՀՀ տրանսպորտի և կապի նախարարի, Ռուսաստանի երկաթուղու և Հարավկովկասյան երկաթուղու անունից:
«Հայկական երկաթուղու» կոնցեսիոն կառավարումն իրականացնում է «ՀԿԵ» ՓԲԸ-ն՝ «Ռուսական երկաթուղիներ» ԲԲԸ-ի հարյուրտոկոսանոց դուստրը: ՀԿԵ-ն իր բալանսում ընդունել ՀԵ շարժակազմը 2008թ. հունիսի մեկից՝ «Հայկական երկաթուղի» պետական ՓԲԸ-ն 30 տարի ժամկետով փոխանցման, կողմերի փոխադարձ համաձայնությամբ ևս 10 տարի երկարացման իրավունքով 2008թ. փետրվարի 13-ի կոնցեսիոն պայմանագրին համապատասխան։--0—
