Հայաստանը պետք է դուրս գա ղարաբաղյան հակամարտության կարգավորման բանակցային գործընթացից և Ղարաբաղին ու Ադրբեջանին հնարավորություն տա ինքնուրույն գտնել խնդրի լուծումը, կարծում է «Սոցիոմետր» սոցիոլոգիական հետազոտությունների անկախ կենտրոնի ղեկավար Ահարոն Ադիբեկյանը:
«Եթե հարցնենք այս հարցի շուրջ ղարաբաղցիների կարծիքը, ապա համոզված եմ, որ 90 տոկոսը կհամաձայնի ինձ հետ», - հինգշաբթի մամուլի ասուլիսի ժամանակ ասաց նա:
Սոցիոլոգը նշեց, որ կարգավորման գործընթացից Հայաստանի դուրս գալուց հետո ղարաբաղցիներն ու ադրբեջանցիներն ավելի հեշտ կգտնեն լուծման ուղիները:
«Մայիսին ԼՂՀ-ում կայացած խորհրդանական ընտրությունների ժամանակ մենք այնտեղ հարցում անցկացրեցինք այն մասին, թե ինչպես են ղարաբաղցիները պատկերացնում իրենց ապագան: Եվ հարցվածների 85 տոկոսը պատասխանեց, որ Ղարաբաղը միայն անկախ է տեսնում, մնացած 15 տոկոսը դժարացավ կանխատեսումներ անել», - ասաց Ադիբեկյանը:
Նա ընդգծեց, որ Ղարաբաղում պատերազմը քիչ հավանական է, քանի որ այն շատ վտանգավոր է Ադրբեջանի համար:
«Ադրբեջանը միատարր պետություն չէ, և Իլհամ Ալիևի իշխանությունները խնդիրներ ունեն ազգային փոքրամասնությունների հետ: Պատերազմը կարող է սպառնալ Ադրբեջանի պետականությանը», - ավելացրեց Ադիբեկյանը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
