Ողջ աշխարհի հայ կինեմատոգրաֆիստներն իրենց ասոցիացիան կստեղծեն, հինգշաբթի հայտարարել է «Ոսկե ծիրան» միջազգային կինոփառատոնի տնօրեն Հարություն Խաչատրյանը, հաղորդում է «ՌԻԱ Նովոստին»:
«Ֆրանսահայ կինոգործիչ, պրոդյուսեր Ալեն Թերզյանի առաջարկով կստեղծվի Աշխարհի հայ կինեմատոգրաֆիստների ասոցիացիա: Այսօր երեկոյան «Ոսկե ծիրան» փառատոնին մասնակցելու նպատակով Երևան ժամանած հայազգի բոլոր կինոգործիչները կհավաքվեն այդ առաջարկը քննարկելու նպատակով», - մամուլի ասուլիսի ժամանակ ասաց Խաչատրյանը:
Նրա խոսքերով՝ այս նախաձեռնության նպատակն է աջակցություն ցուցաբերել տարբեր երկրներում բնակվող հայերին, ովքեր ցանկանում են կինեմատոգրաֆի ոլորտ մտնել, դառնալ կինոռեժիսոր:
«Անհրաժեշտ է օգնել տաղանդավոր մարդկանց, ովքեր օգնություն չեն ստացել: Պետք է այնպես անել, որ հայերը հաջողության հասնելու համար չխուսափեն իրենց ինքնությունից, որպեսզի նրանց համար ավելի շահավետ լինի լինել հայ, պահպանել հայկական արմատները, կոչվել հայ կինեմատոգրաֆիստներ», - ասել է Խաչատրյանը:
Նա տեղեկացրել է, որ մտադիր է այս հարցը քննարկել ՀՀ վարչապետի, սփյուռքի և մշակույթի նախարարների հետ:
Այս օրերին Երևանում անցկացվում է «Ոսկե ծիրան» յոթերորդ միջազգային ամենամյա կինոփառատոնը, որում ներկայացված են ավելի քան 100 ֆիլմեր աշխարհի 62 երկրներից:
«Ոսկե ծիրան» ամենամյա միջազգային կինոփառատոնը տարածաշրջանում ամենահեղինակավորներից է և անցկացվում է 2004թ.-ից։ «Ոսկե ծիրան» 7-րդ փառատոնը կանցկացվի Երևանում հուլիսի 11-18-ը, որի ընթացքում կներկայացվի ավելի քան 100 կինոնկար՝ աշխարհի 62 երկրից։--0--
