Ադրբեջանի նախագահը չի կարող որոշում ընդունել Ղարաբաղի ժողովրդի փոխարեն. հայ պատգամավոր

Ադրբեջանի նախագահ Իլհամ Ալիևը չի կարող որոշում ընդունել Ղարաբաղի ժողովրդի փոխարեն, ասաց իշխող Հայաստանի Հանրապետական կուսակցության խորհրդարանական խմբակցության քարտուղար Էդուարդ Շարմազանովը՝ մեկնաբանելով Ալիևի երեկվա հայտարարությունը։

Երեքշբթի նախարարների կաբինետի ընդլայնված նիստի ժամանակ Ալիևը հայտարարել է, որ Ադրբեջանը երբեք զիջումների չի գնա Լեռնային Ղարաբաղի հարցում, իսկ «ադրբեջանական պետությունն ու ադրբեջանցի ժողովուրդը երբեք Լեռնային Ղարաբաղին չեն տա ինչ-որ կարգավիճակ, որը նրան կարող է բաժանել Ադրբեջանից»։

Ըստ Շարմազանովի, այս հայտարարությունը վկայում է, որ տգիտությունը սահմաններ չունի։

«Ադրբեջանի չկայացած սուլթանին հիշեցնում եմ, որ ինքնորոշման իրավունքը նշանակում է , որ ժողովուրդն ինքը պետք է որոշի իր ճակատագիրը»,- նշեց պատգամավորը։

Ըստ նրա, ժողովրդի ինքնորոշման իրավունքը բացառում է այնպիսի իրավիճակը, որի ժամանակ մի երկրի ժողովուրդը որոշում է մյուսի փոխարեն։

«Եթե ինչ-որ մեկը մինչ օրս Ալիևի և իր պետության փոխարեն որոշում է ընդունում, դա չի նշանակում, որ նա կամ իր ազգակիցները կարող են ինչ-որ որոշում կայացնել Արցախի փոխարեն»,- նշեց պատգամավորը։

«Դա կարող է անել միայն Արցախի ժողովուրդը, որը վաղուց որոշել է, որ անկախությունն այլընտրանքներ չունի»,- ավելացրեց նա։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-