ԱՄՆ պետքարտուղար Հիլարի Քլինթոնի այցը Հայաստան և նրա հայտարարությունները ցույց տվեցին, որ ԱՄՆ-ն հայ-թուրքական երկխոսության տապալման պատասխանատվությունը բարդում է Թուրքիայի վրա, երեքշաբթի լրագրողներին ասաց «Ժառանգություն» ընդդիմադիր կուսակցության խորհրդարանական խմբակցության ղեկավար Ստեփան Սաֆարյանը:
«Հայ-թուրքական հարաբերությունների վերաբերյալ Քլինթոնի հայտարարությունը, մասնավորապես այն, որ գնդակը գտնվում է Թուրքիայի տարածքում, ակնհայտ կերպով վկայում է այն մասին, որ երկխոսության տապալման և գործընթացի հետագա առաջխաղացման բեռը ԱՄՆ-ն բարդում է Թուրքիայի վրա», - ասաց Սաֆարյանը:
ԱՄՆ պետքարտուղար Հիլարի Քլինթոնը գտնվում էր Հայաստանում Արևելյան Եվրոպայի երկրներ նախատեսված տարածաշրջանային այցի շրջանակներում, որի ընթացքում այցելել է նաև Լեհաստան, Ուկրաինա, Վրաստան և Ադրբեջան:
Ինչպես կարծում է պատգամավորը, պետքարտուղարի այցը Թուրքիային ուղղված մի քանի ազդանշաններ էր պարունակում, մասնավորապես այն, որ ԱՄՆ-ն այս պահին չի դիտարկում Թուրքիային որպես Արևելյան Եվրոպայի մաս:
Միաժամանակ նա նշեց, որ 1915 թ.-ի Հայոց ցեղասպանության զոհերի հուշահամալիր Քլինթոնի այցելությունը թեև մասնավոր էր, սակայն բավականին ցուցադրական քայլ էր, որը կրկին կապված է Հայաստանի խնդիրների հետ և ներկայացնում է Թուրքիայի նկատմամբ ԱՄՆ-ի վերաբերմունքը:
«Այս ամենը վկայում է այն մասին, որ ԱՄՆ-ն Թուրքիային սպասված աջակցություն չի ցուցաբերի եվրաինտեգրման հարցում, չնայած քննարկումների և որոշակի գործարքների արդյունքում իրավիճակը կարող է փոխվել: Սակայն, այնուամենայնիվ, այցը ցուցադրեց Թուրքիայի և տարածաշրջանում նրա վարած քաղաքականության նկատմամբ ԱՄՆ-ի վրդովվմունքը», - ասաց Սաֆարյանը:
Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրի միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված:-0-
