«Սահմանների համալիր կառավարման ռազմավարությունը և գործողությունների ծրագիրը» սեմինարի շրջանակներում հայ և միջազգային փորձագետները հունիսի 28-30-ը Ծաղկաձորում կքննարկեն սահմանամերձ անվտանգության ազգային հայեցակարգի մշակման խնդիրները։
«Այսօրվա սեմինարի գլխավոր նպատակն է նշագծել սահմանների համալիր կառավարման վերաբերյալ ռազմավարական փաստաթղթի հիմնական եզրագծերը և, այդ հստակ ռազմավարությունից ելնելով, գործողությունների համապարփակ ծրագիր մշակել»,- լրագրողներին հայտնեց Հայաստանում UNDP մշտական ներկայացուցչության տեղակալ Դիրք Բոբերգը։
Միաժամանակ նա նշեց, որ սեմինարի ընթացքում ուշադրության մեծ մասը կհատկացվի հայկական պետական գերատեսչությունների միջև համագործակցության ամրապնդմանը։
«Սահմանների համալիր կառավարման ռազմավարությունը և գործողությունների ծրագիրը» սեմինարը կազմակերպվել է Հարավային Կովկասի սահմանների համալիր կառավարման ծրագրի կողմից ՝ UNDP-ի աջակցությամբ։
Սեմինարին մասնակցում են շուրջ 30 հայ և միջազգային փորձագետներ՝ Հայաստանի զանազան պետական գերատեսչություններից։
Ինչպես անցած ուրբաթ հայտնեց ՀՀ Ազգային անվտանգության խորհրդի քարտուղար Արթուր Բաղդասարյանը, հայկական կողմը մտադիր է ամրապնդել սահմանային անվտանգությունը և արդիականացնել սահմանային ենթակառուցվածքները։ Ըստ նրա, այս խնդրի լուծման համար հատուկ միջգերատեսչական հանձնաժողով է ձևավորվել, որը մինչև տարեվերջ պետք է միջոցառումների և անհրաժեշտ քայլերի փաթեթ ներկայացնի։ -0-
