Ստորագրվեց Հայաստանի և ՄԱԿ-ի մանկական հիմնադրամի միջև համագործակցության 2010-2015թթ.-ի գործողությունների ծրագիրը

Հունիսի 24-ին ԱԳ նախարար Էդվարդ Նալբանդյանը և ՄԱԿ-ի մանկական հիմնադրամի ներկայացուցիչ Լեյլի Մոշիրին ստորագրեցին «Հայաստանի Հանրապետության կառավարության և Միավորված Ազգերի կազմակերպության մանկական հիմնադրամի միջև 2010-2015թթ. Հայաստանում իրականացվող գործողությունների ծրագիրը», տեղեկացնում է ՀՀ ԱԳՆ մամուլի ծառայությունը:

Գործողությունների ծրագիրը նախանշում է ՀՀ Կառավարության և ՅՈՒՆԻՍԵՖ-ի գալիք վեց տարիների համագործակցության ուղղությունները, որոնք ուղղված են Հայաստանում երեխաների և կանանց իրավիճակի բարելավմանը և երեխաների համար բարենպաստ միջավայրի ստեղծմանը:

Փաստաթղթով նախատեսվում է բարեփոխումների իրականացում երեխաների սոցիալական ապահովության, նրանց իրավունքների պաշտպանության, հատուկ կրթության որակի բարձրացման, անապահով ընտանիքներին և երեխաներին առավել արդյունավետ սոցիալական ծառայությունների մատուցման և մի շարք այլ ոլորտներում:  -0-