Հայաստանը դեռ չի կողմնորոշվել, թե ում օգտին է քվեարկելու ՖԻԴԵ-ի նախագահի ընտրություններում. ՀՀ շախմատի ֆեդերացիայի փոխնախագահ

ԵՐԵՎԱՆ, 25 հունիսի. /Նովոստի-Արմենիա/. Հայաստանը դեռ չի կողմնորոշվել, թե ում օգտին է քվեարկելու ՖԻԴԵ-ի նախագահի ընտրություններում, «Նովոստի-Արմենիա» գործակալությանը հայտնեց Հայաստանի շախմատի ֆեդերացիայի փոխնախագահ Սմբատ Լպուտյանը։

ՖԻԴԵ-ի նախագահի պաշտոնի համար տարվող պայքարում մասնակցում են ներկայիս նախագահ Կիրսան Իլյումժինովը և շախմատի աշխարհի նախկին չեմպիոն Անատոլի Կարպովը։

«Մենք պետք է լսենք նրանց և ծանոթանանք նրանց ծրագրերին»,- ասաց Լպուտյանը։

Նա նշեց, որ ներկա նախագահ Իլյումժինովը բավական ակտիվ է, սակայն նրան անհրաժեշտ է որոշ փոփոխություններ կատարել, մասնավորապես, իր թիմում, «հակառակ դեպքում նա կրկին քննադատության առիթ կտա»։

«Պետք է զգալիորեն ուժեղացնել գործադիր տնօրինությունը, որպեսզի հնարավոր լինի լուծել շախմատի առջև ծառացած խնդիրները»,- նկատեց գրոսմայստերը։

Ինչ վերաբերում է Կարպովին, ապա, Լպուտյանի խոսքով, «շատ կարևոր կլինի այն, թե ինչ ուժերով նա հանդես կգա, քանի որ այն ուժերը, որ նա ներկայացնում է, առայժմ շատ բան չեն ասում»։

Միաժամանակ Ֆեդերացիայի փոխնախագահը շախմատի համար դրական և օգտակար է համարում ՖԻԴԵ-ի նախագահի պաշտոնի համար ծավալված պայքարը։

«Ես կարծում եմ, որ շատ դրական է, երբ կա պայքար, կան մրցակցող հակառակորդներ։ Դա ստիպում է շախմատի աշխարհն աշխուժանալ, իսկ թեկնածուներին՝ նոր գաղափարներ և ծրագրեր առաջարկել, ինչը լավ է անդրադառնում շախմատի մասսայականացման և զարգացման վրա»,- նշեց նա։ -0-