Տատյանա Կոսինցևան պայքարի է տրամադրված Ջերմուկի շախմատի մրցաշարում

Ռուսաստանի շախմատի կանանց հավաքականի առաջատարներից մեկը՝ Տատյանա Կոսինցևան, հայտարարել է, որ պայքարի է տրամադրված հինգշաբթի Ջերմուկում մեկնարկած ՖԻԴԵ-ի կանանց Գրան պրիի չորրորդ փուլի յուրաքանչյուր պարտիայում։

«Բոլոր մասնակիցներն էլ ուժեղ են, տիտղոսակիր, այստեղ աշխարհի երեք չեմպիոնուհի է խաղում։ Գուշակել չեմ ցանկանում, պարզապես կխաղամ և կպայքարեմ յուրաքանչյուր պարտիայում»,- հինգշաբթի ասել է նա լրագրողներին։

Կոսինցևան ընդգծել է, որ մրցաշարին շատ ուժեղ կազմ է մասնակցելու, այդ պատճառով դժվար է գուշակել հաղթողին։ Մասնակիցների թվում նա հատկապես առանձնացրել է ՖԻԴԵ-ի կանանց վարկանիշի առաջատարներից չին Հոու Իֆանին։

ՖԻԴԵ-ի կանանց Գրան պրիի մասնակիցներն են յոթ երկրների 12 շախմատիստուհիներ՝ Հոու Իֆանը (Չինաստան), Անտոանեթ Ստեֆանովան (Բուլղարիա), Պիա Քրամլինգը (Շվեդիա), Տատյանա Կոսինցևան (Ռուսաստան), Մայա Չիբուրդանիձեն (Վրաստան), Սյու Յուխուան (Չինաստան), Նանա Ձանիձեն (Վրաստան), Լիլիթ Մկրտչյանը (Հայաստան), Էլինա Դանիելյանը (Հայաստան), Շեն Յանը (Չինաստան), Բաիրա Կովանովան (Ռուսաստան), Մարթա Ֆիերոն (Էկվադոր)։ Մրցաշարն անցնում է շրջանային համակարգով և կավարտվի հուլիսի 5-ին։

Նախորդ տարի Ջերմուկում անցկացվել է ՖԻԴԵ-ի տղամարդկանց Գրան պրին։ -0-