Հայաստանը հավատարիմ է ժողովրդավարական արժեքներին. նախագահ

Հայաստանը հավատարիմ է ժողովրդավարական արժեքների վրա հիմնված քաղաքացիական հասարակություն կառուցելու նպատակին, հայտարարել է ՀՀ նախագահ Սերժ Սարգսյանը:

«Հայաստանը հանձնառու է ստեղծել տարածաշրջանում փոխադարձ շահերով ու պարտավորություններով ամրագրված կայունության, անվտանգության, համերաշխության և տնտեսական զարգացման միջավայր», - հայտարարել է նախագահը նախօրեին Գերմանիայի «Կոնրադ Ադենաուեր» հիմնադրամում «Հայաստան. հանուն անվտանգ և բարգավաճ Հարավային Կովկասի» թեմայով ելույթի ժամանակ:

Ինչպես հաղորդում է ՀՀ նախագահի մամուլի ծառայությունը, Սարգսյանը համոզմունք է հայտնել, որ կգա մի օր, երբ Հայաստանն իր հարևանների և բարեկամների հետ իրական ու գործնական երկխոսություն կսկսի՝ մեկ սեղանի շուրջ հավաքելով բոլորին:

«Դա է պահանջում «ընդհանուր հորիզոնի տրամաբանությունը»: Եվ վստահ եմ, որ գալու է այն օրը, երբ այն հարցադրմանը, թե «հնարավո՞ր է դա մեր տարածաշրջանում», կլսենք հստակ պատասխան` այո», - հայտարարել է Սարգսյանը:-0-