Սարգսյանը մտահոգություն է հայտնել Մերկելին Ադրբեջանի ռազմատենչ հայտարարությունների վերաբերյալ
Պաշտոնական այցով Գերմանիայի Դաշնային Հանրապետությունում գտնվող Հայաստանի նախագահ Սերժ Սարգսյանը դաշնային կանցլեր Անգելա Մերկելին մտահոգություն է հայտնել խնդիրը ռազմական ճանապարհով լուծելու Ադրբեջանի անթաքույց նկրտումների կապակցությամբ, «Նովոստի-Արմենիա» գործակալությանը հաղորդեցին հայկական պետության ղեկավարի մամուլի ծառայությունից։
«Այդ կերպ Ադրբեջանը վտանգի է ենթարկում ոչ միայն հայ-ադրբեջանական բանակցությունները, այլ նաև ընդհանուր առմամբ տարածաշրջանային կայությունը»,- Սարգսյանի խոսքը մեջբերեցին հաղորդագրության մեջ։
Կողմերը նշել են ԵԱՀԿ Մինսկի խմբի շրջանակներում հակամարտության խաղաղ կարգավորման հասնելու անհրաժետշությունը։
Սարգսյանն ու Մերկելը քննարկել են նաև հարավկովկասյան տարածաշրջանի խնդիրները: Սերժ Սարգսյանը ողջունել է Գերմանիայի հավասարակշիռ քաղաքականությունը տարածաշրջանում:
Անդրադառնալով հայ-թուրքական հարաբերություններին` նախագահը ափսոսանք է հայտնել, որ հարաբերությունների կարգավորմանն ու Եվրոպայում վերջին փակ սահմանի բացմանն ուղղված Հայաստանի և միջազգային հանրության ջանքերը մնացին անարդյունք Թուրքիայի`գործընթացն այլ նպատակներով օգտագործելու և բանակցությունների համաձայնեցված սկզբունքներից հրաժարվելու պատճառով:
Կողմերը կարևորել են Հայաստան-Թուրքիա հարաբերությունների կարգավորման գործընթացում առանց նախապայմանների առաջ շարժվելու անհրաժեշտությունը։
Քննարկվել են նաև երկկողմ հարաբերությունների զարգացման, ինչպես նաև համագործակցության բազմակողմ ձևաչափերի հնարավորություններն իրացնելուն առնչվող հարցեր: -0-
