ԵՐԵՎԱՆ, 21 հունիսի. /Նովոստի-Արմենիա/. ՀՀ ԱԺ նախագահ Հովիկ Աբրահամյանը ստորագրել է որոշում, ըստ որի` հունիսի 23-ին կգումարվի ՀՀ խորհրդարանի արտահերթ նստաշրջանը, երկուշաբթի «Նովոստի-Արմենիա» գործակալությանը հաղորդեցին երկրի խորհրդարանի մամուլի ծառայությունից։
Արտահերթ նստաշրջանի գումարման մասին որոշումը ընդունվել է Ազգային ժողովի պատգամավորների նախաձեռնությամբ ՝ Սահմանադրության 70-րդ հոդվածի համաձայն։
Նստաշրջանի օրակարգում են ընդգրկված շուրջ տասնյակ հարցեր, այդ թվում շարունակվում է «Լեզվի մասին» և «Հանրակրթության մասին» օրենքներում լրացուցիչ փոփոխություններ մտցնելու վերաբերյալ քննարկումները:
Այդ ուղղումները լայն քննարկումների առիթ դարձան։ Մի շարք քաղաքական ուժեր և հասարակական կազմակերպություններ դեմ դուրս եկան օրինագծին։
Անցած նստաշրջանի ժամանակ «Լեզվի մասին» և «Հանրակրթության մասին» օրենքներում լրացուցիչ փոփոխություններ մտցնելու հարցը մինչև վերջ չի քննարկվել։
ՀՀ խորհրդարանի գարնանային նստաշրջանն ավարտվել է հունիսի 10-ին։ -0-
