Վրաստանի և Հայաստանի ԱԳՆ ղեկավարները գոհ են կայացած բանակցություններից

ԵՐԵՎԱՆ, 14 հունիսի. /Նովոստի-Արմենիա/. Վրաստանի ԱԳՆ ղեկավար Գրիգոլ Վաշաձեն երկուշաբթի Թբիլիսիում տեղի ունեցած մամուլի ասուլիսում «հաջողված» է անվանել Թբիլիսիում աշխատանքային այցով գտնվող իր հայ գործընկեր Էդվարդ Նալբանդյանի հետ կայացած բանակցությունները։

«Հանդիպումը բովանդակալի էր։ Մենք երկկողմ հարաբերությունների համալիր ստուգում անցկացրեցինք և ուսումնասիրեցինք այն հարցերը, որոնք անհապաղ լուծում են պահանջում»,- ասել է Վաշաձեն Նալբանդյանի գլխավորած պատվիրակության հետ հանդիպումից հետո։

Ինչպես հաղորդում է «Նովոստի-Գրուզիա» գործակալությունը, Վաշաձեն նշել է, որ Թբիլիսիում տեղի ունեցած բանակցությունների ընթացքում քննարկվել են երկու երկրների գործողությունների համակարգման հարցերը «Արևելյան գործընկերության» նախաձեռնության շրջանակներում, որի կազմում Ուկրաինայի, Մոլդովայի, Բելառուսի և Ադրբեջանի հետ միասին ընդգրկված են Վրաստանն ու Հայաստանը։

Իր հերթին Հայաստանի ԱԳՆ ղեկավարը մամուլի ասուլիսում կրկնել է նախորդ տարվա այցի ընթացքում ասված իր խոսքերը, որ «Վրաստանի և Հայաստանի միջև գոյություն չունեն այնպիսի հարցեր, որոնք հնարավոր չլինի լուծել բանակցությունների հիման վրա»։

Նախարարը մատնանշել է նաև Վրաստանի և Հայաստանի միջև տնտեսական և մշակութային հարաբերությունների ինտենսիվ զարգացումը։

Նալբանդյանը երկօրյա աշխատանքային այցով հունիսի 13-ին մեկնել է Վրաստան։ Երկուշաբթի նա հանդիպումներ է անցկացրել ԱԳՆ-ում սփյուռքահայության ներկայացուցիչների հետ։ Օրվա երկրորդ կեսին Նալբանդյանն ուղևորվել է Բաթումի (Աջարիայի ինքնավարություն), որտեղ նա հանդիպում կունենա Վրաստանի նախագահ Միխեիլ Սահակաշվիլիի հետ։ -0-