Ղարաբաղյան հակամարտությունը պետք է լուծել բացառապես երկխոսության և բանակցությունների ճանապարհով. Սոցինտերնի գլխավոր քարտուղար

ԵՐԵՎԱՆ, 10 հունիսի./Նովոստի-Արմենիա/. Ղարաբաղյան հակամարտությունը պետք է լուծել բացառապես երկխոսության և բանակցությունների ճանապարհով, հինգշաբթի լրագրողներին հայտնեց Սոցինտերնի Գլխավոր քարտուղար Լուիս Այալան, ով Երևան է ժամանել Սոցինտերնի տարածաշրջանային ժողովին մասնակցելու համար:

«Մեզ համար այդ հակամարտությունը, ինչպես ցանկացած այլ հակամարտություն, պետք է երկխոսության, բանակցությունների ճանապարհով լուծվի, և այլ միջոցները պետք է բացառվեն»,- նշեց նա:

Այալան ընդգծեց, որ երկարատև խաղաղության համար անհրաժեշտ է հակամարտության երկու կողմերի համար ընդունելի արդար լուծում։

Սոցինտերնի գլխավոր քարտուղարի կարծիքով, հակամարտության կարգավորման գործում կարևոր են երկու կողմերի միջև երկխոսության կարգավորման ցանկացած քայլերը, և նա հույս հայտնեց, որ Երևանում կայանալիք ժողովը կօժանդակի այդ գործընթացին:

Միաժամանակ Այալան նշեց, որ բազմիցս է եղել Հայաստանում, Ադրբեջանում, նաև Լեռնային Ղարաբաղում, այդ պատճառով էլ ծանոթ է իրավիճակին:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-